झापा, पथरिया - कचनकवल गाउँपालिका वडा नम्बर २ ले आर्थिक वर्ष २०८२/०८३ मा संघीय, प्रदेश तथा स्थानीय सरकारबाट स्वीकृत करोडौंको बजेटलाई प्रभावकारी रूपमा कार्यान्वयन गर्नका लागि एक उदाहरणीय अभ्यासको रूपमा सरोकारवाला पक्षहरूसँग व्यापक छलफल तथा अन्तर्क्रिया कार्यक्रम सम्पन्न गरेको छ।
स्थानीय समाजसेवी, बुद्धिजीवी, राजनीतिकर्मी, जनप्रतिनिधि, युवा तथा महिलासहितको उपस्थिति रहेको उक्त अन्तर्क्रियामा वडाभित्रका प्राथमिक योजनाहरूबारे जानकारी गराउँदै सहभागीहरूको सुझाव समेत संकलन गरिएको थियो। कार्यक्रम कचनकवल गाउँपालिका अध्यक्ष कालेन्द्र प्रसाद सिंह राजवँशी, उपाध्यक्ष नवराज भट्टराई तथा गाउँपालिका इञ्जीनियर डिल्ली गौतमको विशेष उपस्थितिमा सम्पन्न भएको थियो।
"विकास योजनामा सहभागिता बिना अपनत्व आउँदैन, योजनाको हरेक चरणमा जनसरोकारलाई समावेश गर्दै अघि बढ्ने हाम्रो अठोट हो," अध्यक्ष राजवँशीले कार्यक्रममा सम्बोधन गर्दै भन्नुभयो।
उपाध्यक्ष नवराज भट्टराईले स्थानीय जनताको सुझावलाई प्राथमिकतामा राखी योजना कार्यान्वयन गर्नु नै लोकतान्त्रिक अभ्यास भएको बताउँदै थप्नुभयो, "जनसहभागिता विकासको आधार हो, यसलाई व्यवहारमा उतार्दै हामी अघि बढिरहेका छौँ।"
इञ्जीनियर डिल्ली गौतमले पारदर्शी योजना कार्यान्वयनका लागि प्राविधिक पक्ष र जनअपेक्षाबीचको समन्वय अत्यावश्यक हुने उल्लेख गर्दै सहभागीहरूबाट प्राप्त सुझाव अनुसार योजना परिमार्जन गर्न सकिने बताए।
वडा अध्यक्ष लेखनाथ खत्रीले सरोकारवाला सबै पक्षलाई प्रारम्भमै सहभागी गराउने उद्देश्यले छलफल आयोजना गरिएको स्पष्ट पार्दै भन्नुभयो, "हाम्रो प्रयास वडाबासीको अपनत्व र जिम्मेवारीबोध सँगै योजना प्रभावकारिता सुनिश्चित गर्नु हो।"
स्थानीय तहमा विकास योजनाहरूको कार्यान्वयनमा सरोकारवालाको सहभागिता सुनिश्चित गर्दै अघि बढ्ने कचनकवल-२ को यो पहल अनुकरणीय मानिएको छ। यस्ता अभ्यासले न केवल पारदर्शिता, जवाफदेहिता र उत्तरदायित्वलाई बढावा दिन्छ, तर समृद्ध र सहभागितामूलक शासन प्रणालीको मार्ग पनि प्रशस्त गर्छ।
