झापा । जिल्ला प्रहरी कार्यालय झापामा कार्यरत प्रहरी निरीक्षक दुर्गाबहादुर भट्टराई २०८३ साल असोज महिनाका लागि ‘उत्कृष्ट प्रहरी’ घोषित हुनुभएको छ।
कार्यसम्पादनमा देखाएको सक्रियता, जिम्मेवारीप्रतिको प्रतिबद्धता तथा व्यावसायिक दक्षताको मूल्याङ्कन गर्दै उहाँलाई ‘Police of the Month’ को सम्मान प्रदान गरिएको जिल्ला प्रहरी कार्यालय झापाले जनाएको छ।
जिल्ला प्रहरी कार्यालय झापाका प्रमुख प्रहरी उपरीक्षक वसुन्धरा खड्काले प्रहरी निरीक्षक भट्टराईलाई उक्त सम्मान प्रदान गर्नुभएको हो।
प्रहरी सेवामा जिम्मेवारी केवल पदसँग जोडिएको औपचारिक दायित्व नभई नागरिकको सुरक्षा, कानुनी शासन र सार्वजनिक विश्वाससँग प्रत्यक्ष जोडिएको विषय हो। यही सन्दर्भमा कार्यसम्पादनका आधारमा उत्कृष्ट प्रहरी छनोट गर्ने अभ्यासले जिम्मेवारीपूर्वक काम गर्ने प्रहरी कर्मचारीको योगदानलाई संस्थागत रूपमा पहिचान र प्रोत्साहन गर्ने अपेक्षा गरिएको छ।
उक्त सम्मानले प्रहरी संगठनभित्र जवाफदेहिता, व्यावसायिकता र कार्यसम्पादनमा आधारित प्रोत्साहनको संस्कृतिलाई थप बल पुग्ने विश्वास गरिएको छ।
