काठमाडौं। स्थानीय तहको कार्यसम्पादन मूल्यांकनमा देशभरकै उत्कृष्ट जनप्रतिनिधि माओवादी केन्द्रबाट निर्वाचित जनप्रतिनिधिहरू रहेको पाइएको छ।
धादिङको बेनीघाट रोराङ गाउँपालिकाका अध्यक्ष विवेक थपलिया देशभरका उत्कृष्ट जनप्रतिनिधिमध्ये पहिलो स्थानमा परेका छन्। गाउँपालिकामा पारदर्शी नेतृत्व, विकास योजनाको प्रभावकारी कार्यान्वयन र जनमुखी गतिविधिमा देखाएको सक्रियताका आधारमा थपलियाले यो उपलब्धि हासिल गरेका हुन्।
त्यस्तै गुल्मीको रुरुक्षेत्र गाउँपालिकाका अध्यक्ष यदु ज्ञवाली दोस्रो स्थानमा परेका छन्। ज्ञवालीले शिक्षा, स्वास्थ्य र पूर्वाधार विकासमा जनमुखी नेतृत्व देखाउँदै गाउँपालिकालाई उदाहरणीय बनाउन योगदान पुर्याएका कारण उत्कृष्ट सूचीमा परेका हुन्।
उनीहरूसहित माओवादीबाट निर्वाचित अन्य स्थानीय तहका प्रतिनिधिहरू पनि उत्कृष्टतामा परेका कारण पार्टीकै नेतृत्वमा रहेका स्थानीय तह देशभर उल्लेखनीय रूपमा पहिचान बनाउन सफल भएको छ।
विशेष कार्यक्रममार्फत पुर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ले थपलिया र ज्ञवालीलाई बधाईसहित सम्मान गरेका छन्।
माओवादी पार्टी नेतृत्वले स्थानीय तहमै जनताले विश्वास गरेको प्रमाणस्वरूप यसलाई ठूलो सफलताका रुपमा लिएको छ।
