कचनकवल गाउँपालिकाका प्रमुख तथा विभिन्न नेताहरू समृद्धि र विकासका योजनाहरू लिएर हाल काठमाडौंमा सक्रिय छन्। गाउँपालिका अध्यक्ष कालेन्द्र प्रसाद सिंह राजवंशी, उपाध्यक्ष नवराज भट्टराई, वडा अध्यक्ष चिन्तामणि खरेलसहित कोशी प्रदेश भौतिक योजना राज्यमन्त्री भूमि प्रसाद राजवंशी, निवर्तमान प्रदेशसभा सदस्य बसन्त कुमार बानियाँ तथा नेपाली कांग्रेस र नेकपा (एमाले) का अन्य नेताहरू राजधानीमा विभिन्न मन्त्रालयहरूमा योजना पेश गरिरहेका छन्।
टोलीले शहरी विकास, स्वास्थ्य, कृषि तथा पशुपंक्षी, पर्यटन मन्त्रालयमा कचनकवलको विकासका लागि आवश्यक योजना प्रस्तुत गरिसकेको छ। मन्त्रीहरूसँगको छलफलपछि आगामी बजेटमा कचनकवलका विभिन्न परियोजनाहरूलाई प्राथमिकता दिने पहल गरिएको बताइएको छ।
विशेष रूपमा, कचनकवलमा पर्यटन प्रवर्द्धन, पालिका अस्पतालको सञ्चालन तथा अन्य भौतिक पूर्वाधार विकासका लागि टोली सक्रिय रूपमा संवाद गरिरहेको छ। यसै क्रममा, आज प्रधानमन्त्रीका कानुनी सल्लाहकार अग्नी खरेल र स्वकीय सचिव रोशनी मेचेसँग टोलीले भेटवार्ता गर्दै भोलि प्रधानमन्त्री केपी शर्मा ओलीसँग प्रत्यक्ष भेटघाट गरी योजनाहरू प्रस्तुत गर्ने कार्यक्रम रहेको जनाईएको छ।
काठमाडौं केन्द्रित गाउँपालिकाको दोस्रोपटक भएको यस पहलले कचनकवलको समग्र विकास र स्थानीय जनताको जीवनस्तर उकास्ने अपेक्षा गरिएको छ।
