बनियानी - कचनकवल गाउँपालिकाको न्यायिक समितिले प्रभावकारी कार्यसम्पादन गर्दै FRA (Financial Risk Assessment) तथा LISA Nepal Dashboard को प्रतिवेदनअनुसार ९६.४३ प्रतिशत अंक प्राप्त गरेको छ। प्रतिवेदनका अनुसार, न्यायिक समितिको कार्य सम्पादन स्थानीय तहका अन्य शाखाहरूभन्दा उत्कृष्ट देखिएको छ। समितिले स्थानीय विवाद समाधान, मेलमिलाप तथा न्यायिक प्रक्रियालाई व्यवस्थित रूपमा अघि बढाउँदै नागरिकलाई छरितो र पारदर्शी न्याय सेवा उपलब्ध गराएको छ।
न्यायिक समितिले प्रविधिमैत्री प्रणाली अपनाई न्याय सम्पादनलाई प्रभावकारी बनाएको छ। कानुनी प्रक्रिया सहज बनाउन परामर्श सेवा, मेलमिलाप तथा मुद्दा व्यवस्थापन प्रणालीलाई व्यवस्थित रूपमा अघि बढाइएको छ। न्यायिक समिति संयोजक तथा गाउँपालिका उपाध्यक्ष नवराज भट्टराईका अनुसार, न्यायिक सेवा छिटो, निष्पक्ष र पहुँचयुक्त बनाउन प्रविधिमैत्री प्रणालीले महत्वपूर्ण भूमिका खेलेको छ।
LISA Nepal Dashboard प्रतिवेदन अनुसार, कचनकवल गाउँपालिकाको समग्र गुणस्तर सूचक ६९ प्रतिशत रहेको छ :
-शासकीय प्रवन्ध : ८८.८९%
-वार्षिक बजेट तथा योजना व्यवस्थापन : ७२.७३%
-वित्तीय एवं आर्थिक व्यवस्थापन : ६५.९१%
-सेवा प्रवाह : ६८.७५%
-सामाजिक समावेशीकरण : ९०%
-सहकार्य तथा समन्वय : ७५%
त्यस्तै, FRA प्रतिवेदन अनुसार, गाउँपालिकाले समग्र रूपमा ८१% अंक प्राप्त गरेको छ। प्रक्रियागत जोखिममा ८३.९६%, नतिजासँग सम्बन्धित जोखिममा ८८.४६% तथा वित्तीय अनुशासन सम्बन्धी जोखिममा ७३.५३% अंक प्राप्त गरेको छ। योजना, बजेट तथा कार्यक्रम व्यवस्थापनमा ८५.७१%, कार्यान्वयन क्षमतामा ८१.०३%, लेखांकन तथा प्रतिवेदन प्रणालीमा ८८.२४% तथा अनुगमन, मूल्याङ्कन एवं लेखापरीक्षणमा ८१.२५% अंक प्राप्त भएको छ।
गाउँपालिकाले आर्थिक पारदर्शिता, न्यायिक सेवा सुधार, राजस्व संकलन, सेवा प्रवाह तथा समावेशी विकास सुधार गर्न विभिन्न रणनीति अपनाइरहेको छ। न्यायिक समितिले विवाद समाधान प्रक्रियालाई अझ प्रभावकारी बनाउन डिजिटल प्रणालीलाई थप सशक्त बनाउने योजना बनाएको छ। गाउँपालिकाका अध्यक्ष कालेन्द्र प्रसाद सिंह राजवंशीले बहुवर्षीय योजना निर्माण गरी न्यायिक प्रक्रियालाई अझ प्रभावकारी बनाउने प्रतिबद्धता व्यक्त गर्दै नागरिकलाई छिटो, सुलभ र न्यायोचित सेवा प्रदान गरिने बताए। उपाध्यक्ष तथा न्यायिक समिति संयोजक नवराज भट्टराईले कानुनी पहुँचलाई प्रविधिमैत्री बनाउँदै निष्पक्ष र छरितो न्याय सम्पादन गर्न थप सुधार कार्यक्रम ल्याइने उल्लेख गरे।
गाउँपालिकाले FRA र LISA प्रतिवेदनका आधारमा आवश्यक सुधार कार्यक्रमहरू सञ्चालन गर्ने जनाएको छ। न्यायिक सेवाको प्रभावकारिता बढाउने, नागरिकलाई शीघ्र न्याय दिलाउने र समावेशी विकासका नीतिहरूलाई प्राथमिकता दिने गाउँपालिकाको योजना रहेको छ। LISA र FRA को सकारात्मक नतिजा प्राप्त गर्न सम्पूर्ण शाखाको योगदान महत्वपूर्ण रहेको भन्दै गाउँपालिकाले भविष्यमा अझ व्यवस्थित प्रणाली अपनाउने जनाएको छ।
