कचनकवल। नेपालका प्रतिष्ठित तथा उत्कृष्ट नतिजा निकाल्ने विद्यालयहरूसँग प्रतिस्पर्धा गर्ने क्षमता अब राजधानी वा ठूला शहरका विद्यालयमा मात्र सीमित नरहेको उदाहरण बनेको छ कचनकवल गाउँपालिका-२, सुकुनाडिगीस्थित स्वर्णिम शिक्षा सदन माध्यमिक विद्यालय।
माध्यमिक तह उत्तीर्ण परीक्षा २०८२ को नतिजामा विद्यालयले शतप्रतिशत सफलता हासिल गर्दै आफूलाई गुणस्तरीय शिक्षाको भरोसायोग्य केन्द्रका रूपमा स्थापित गरेको छ। अझ उल्लेखनीय पक्ष त के छ भने विद्यालयका विद्यार्थी जोयेश थापाले ३.९६ GPA प्राप्त गर्दै देशका नाम चलेका तथा सुविधासम्पन्न विद्यालयका उत्कृष्ट विद्यार्थीहरूसँग बराबरीको प्रतिस्पर्धात्मक उपलब्धि हासिल गरेका छन्।
शिक्षाविद्हरूका अनुसार ३.९६ GPA जस्तो नतिजा केवल व्यक्तिगत सफलता मात्र नभई विद्यालयको शैक्षिक वातावरण, शिक्षकको प्रतिबद्धता, अभिभावकको सहयोग तथा व्यवस्थापनको दूरदृष्टिको संयुक्त प्रतिफल हो। ग्रामीण क्षेत्रमै सञ्चालन भइरहेको विद्यालयबाट यस्तो उपलब्धि हासिल हुनु शिक्षा क्षेत्रमा सकारात्मक सन्देशका रूपमा हेरिएको छ।
विगतमा उत्कृष्ट नतिजाका लागि काठमाडौं, पोखरा, विराटनगर वा अन्य शहरी क्षेत्रका विद्यालयहरूको चर्चा हुने गरेको अवस्थामा स्वर्णिम शिक्षा सदनले कचनकवललाई पनि राष्ट्रिय शैक्षिक नक्सामा चिनाउन महत्वपूर्ण योगदान दिएको छ। यस उपलब्धिले ग्रामीण क्षेत्रका विद्यार्थीहरूमा आत्मविश्वास बढाउनुका साथै “अवसरभन्दा मेहनत ठूलो हुन्छ” भन्ने सन्देश समेत दिएको छ।
विद्यालयले हासिल गरेको शतप्रतिशत नतिजा र जोयेश थापाको उत्कृष्ट GPA ले कचनकवलको शैक्षिक सम्भावनालाई नयाँ ढंगले उजागर गरेको छ। सीमित स्रोतसाधनका बाबजुद गुणस्तरीय शिक्षा प्रदान गर्न सकिने प्रमाण प्रस्तुत गर्दै स्वर्णिम शिक्षा सदन आज केवल स्थानीय विद्यालय मात्र नभई उत्कृष्ट शैक्षिक संस्थाहरूको सूचीमा उक्लँदै गरेको एक प्रेरणादायी शैक्षिक गन्तव्यका रूपमा स्थापित हुँदै गएको छ।
शिक्षाको गुणस्तर, विद्यार्थीको मेहनत र विद्यालयको समर्पणले गर्दा अब कचनकवलको नाम कृषि उत्पादनका लागि मात्र होइन, उत्कृष्ट शैक्षिक उपलब्धिका लागि पनि चर्चा हुन थालेको छ। स्वर्णिम शिक्षा सदनको यो सफलता सम्पूर्ण कचनकवलवासीका लागि गर्वको विषय बनेको छ।
