झापा, कचनकवल - शैक्षिक व्यवस्थापन प्रणालीलाई व्यवस्थित, पारदर्शी र उत्तरदायी बनाउन लागू गरिएको Education Management Information System (EMIS) को प्रभावकारी कार्यान्वयनमा कचनकवलका केही विद्यालयहरू उदासीन देखिएका छन्। यसै सन्दर्भमा स्वर्णिम शिक्षा सदन माध्यमिक विद्यालय, कचनकवल-२ (सुकुनाडिगी) ले गाउँपालिका शिक्षा शाखासँग औपचारिक रूपमा सूचना माग गर्दै गम्भीर चासो व्यक्त गरेको छ।
विद्यालयका प्रधानाध्यापक दिवस भट्टराईद्वारा पेश गरिएको निवेदनमा शैक्षिक सत्र २०८२ मा EMIS ट्रान्सफर नगरी विद्यार्थी भर्ना तथा कक्षोन्नति गरिएको दाबी गरिएको छ। उक्त निवेदनमा विद्यापाणी मावि कचनकवल-३(पथरिया), गोल्डेन फ्यूचर मावि कचनकवल-६(बनियानी)तथा कचनकवल विद्या मन्दिर मावि कचनकवल-६(बनियानी) लाई नियम विपरीत कार्य गर्ने संस्थागत विद्यालयका रूपमा उल्लेख गरिएको छ।
निवेदनमार्फत ती विद्यालयहरूले EMIS प्रणालीको औपचारिक प्रक्रिया पूरा नगरी विद्यार्थी व्यवस्थापन गरेको प्रमाणस्वरूप प्रतिलिपि उपलब्ध गराउन शिक्षा शाखासँग अनुरोध गरिएको छ। साथै, नियमानुसार आवश्यक शुल्क बुझाएर सो विवरण प्राप्त गर्न माग गरिएको छ, जसले शैक्षिक प्रशासनमा पारदर्शिता र जवाफदेहिता सुनिश्चित गर्ने उद्देश्य राखेको देखिन्छ।
EMIS ट्रान्सफर प्रणाली विद्यार्थीको शैक्षिक अभिलेखलाई एकीकृत, प्रमाणिक र अनुगमनयोग्य बनाउनको लागि अनिवार्य मानिन्छ। यसलाई बेवास्ता गर्दै गरिएको भर्ना र कक्षोन्नति प्रक्रियाले न केवल शैक्षिक मापदण्डलाई कमजोर बनाउँछ, बल्कि नीति कार्यान्वयनमा समेत गम्भीर प्रश्न खडा गर्छ।
यस घटनाले स्थानीय तहको शिक्षा व्यवस्थापनमा कडाइका साथ अनुगमन र नियमन आवश्यक रहेको स्पष्ट संकेत दिएको छ। शिक्षा शाखाले यस विषयमा निष्पक्ष छानबिन गरी आवश्यक कदम चाल्ने अपेक्षा गरिएको छ, ताकि आगामी दिनमा EMIS प्रणालीको पूर्ण पालना सुनिश्चित गर्न सकियोस्।
