काठमाडौँ - शिक्षा, विज्ञान तथा प्रविधि मन्त्रालयअन्तर्गत शिक्षा तथा मानव स्रोत विकास केन्द्रले निजी विद्यालयहरूलाई आगामी वैशाख महिनाको पठनपाठन शुल्क नलिन निर्देशन दिएको छ। केन्द्रका प्रवक्ता महेन्द्र पराजुलीका अनुसार सरकारले वैशाख २१ गतेदेखि मात्र औपचारिक रूपमा पठनपाठन सञ्चालन गर्ने निर्णय गरेकाले उक्त महिनाको शुल्क असुल गर्न नपाइने स्पष्ट गरिएको हो।
यस वर्ष सरकारले वैशाख १५ गतेदेखि भर्ना प्रक्रिया सुरु गर्ने र वैशाख २१ गतेबाट कक्षा सञ्चालन गर्ने नीति लिएको छ। विगतमा वैशाख १ गतेदेखि नै शैक्षिक सत्र सुरु हुने अभ्यास रहेकाले अभिभावकहरूमा शुल्क सम्बन्धी अन्योलता देखिएको थियो।
सरकारको यस निर्णयले पठनपाठन सुरु नहुन्जेलसम्म आर्थिक दायित्व नपर्ने व्यवस्था सुनिश्चित गर्दै अभिभावकलाई केही हदसम्म राहत प्रदान गर्ने अपेक्षा गरिएको छ।
