झापा, बनियानी । कचनकवल गाउँपालिका-६ स्थित प्राथमिक स्वास्थ्य केन्द्र बनियानीमा ट्रान्सफर्मरको अभावका कारण विद्युत् आपूर्ति कमजोर हुँदा सेवाप्रवाह प्रभावित भएको छ। दैनिक सयौं बिरामीको उपचारमा समर्पित केन्द्रमा एक्स-रे मेसिन, ल्याब उपकरण, इन्टरनेट र खोप भण्डारणका लागि प्रयोग हुने रेफ्रिजेरेटरहरू समेत कम भोल्टेजको समस्याले प्रभावकारी रूपमा सञ्चालन हुन नसकेको गुनासो उठेको छ।
स्वास्थ्य केन्द्रले पछिल्लो समय उपकरण थप गर्दै सेवा विस्तार गरेको भए पनि विद्युत् आपूर्तिको समस्या झन् चर्किँदै गएको छ। केन्द्रका अनुसार बीमा सर्भरसमेत लो भोल्टेजका कारण पटक-पटक अवरुद्ध हुने स्थिति आएको छ, जसले स्वास्थ्य बीमाको दायरा भित्रका सेवाग्राहीलाई थप सास्ती दिएको छ।
नेपाल विद्युत् प्राधिकरणलाई पटक-पटक लिखित तथा मौखिक रूपमा जानकारी गराइएको भए पनि समस्या समाधानमा प्राधिकरणले आवश्यक तत्परता नदेखाएको गुनासो केन्द्रको छ। “जनस्वास्थ्यसँग प्रत्यक्ष सम्बन्धित सेवामा यस्तो किसिमको उदासीनता दुर्भाग्यपूर्ण छ,” केन्द्रका एक स्रोतले बताए।
स्थानीय सरकारले पनि यो विषयलाई प्राथमिकतामा राख्दै निकट भविष्यमा सो स्वास्थ्य केन्द्रलाई आधारभूत अस्पतालका रूपमा रूपान्तरण गर्ने तयारी गरिरहेको छ। त्यसका लागि आवश्यक पूर्वाधार तथा उपकरण तयारीसँगै ट्रान्सफर्मर जडान गर्न नेपाल विद्युत् प्राधिकरणलाई पत्राचार गरिसकिएको जनाइएको छ।
यदि तत्काल समस्या समाधान नगरिएमा संघ, प्रदेश वा स्थानीय सरकारको सहयोगमा ट्रान्सफर्मर खरिद गरेरै भए पनि विद्युत् आपूर्ति स्थायीत्व ल्याउनुपर्ने आवश्यकतामा स्थानीयवासी जोड दिइरहेका छन्।
