झापा, बनियानी - कचनकवल गाउँपालिकाको स्वास्थ्य शाखा तथा प्राथमिक स्वास्थ्य केन्द्र बनियानीको आयोजनामा आज सम्पन्न भएको एक दिवसीय छाला तथा स्त्रीरोगसम्बन्धी निःशुल्क स्वास्थ्य शिविर सफलतापूर्वक सम्पन्न भएको छ। बिएण्डसी टिचिङ्ग हस्पिटल, बिर्तामोडको प्राविधिक सहयोगमा सम्पन्न शिविरमा विशेषज्ञ चिकित्सकहरूद्वारा स्थानिय महिलाहरू र अन्य बिरामीहरूको परीक्षण तथा परामर्श प्रदान गरिएको छ।
शिविरमा छाला रोग र स्त्रीरोग सम्बन्धी विशेषज्ञ सेवा प्रदान गरिएको हो। शिविरमा उल्लेख्य संख्यामा महिलाहरूको सहभागिता रहेको थियो।
कार्यक्रममा कचनकवल गाउँपालिका अध्यक्ष कालेन्द्र प्रसाद सिंह राजवँशीले भन्नुभयो, “सामुदायिक स्वास्थ्य सेवामा यस्तो प्रकारको सहयोग अत्यन्त सराहनीय छ। बिएण्डसी टिचिङ्ग हस्पिटललाई धन्यवाद दिँदै हामी आगामी दिनमा पनि सहकार्यलाई निरन्तरता दिनेछौं।”
त्यस्तै, गाउँपालिका उपाध्यक्ष नवराज भट्टराईले भन्नुभयो, “स्वास्थ्य पहुँच नपुगेका समुदायलाई लक्षित गरेर गरिएको यस्तो शिविरले गाउँपालिकाको स्वास्थ्य नीति र दिगो विकास लक्ष्यलाई टेवा पुर्याउँछ। यस्ता सहकार्यलाई संस्थागत बनाएर अघि बढ्नुपर्छ।”
कचनकवल वडा नं. ६ का वडाध्यक्ष चिन्तामणि खरेलले शिविरको व्यवस्थापनमा योगदान गर्ने प्राथमिक स्वास्थ्य केन्द्र बनियानीका सम्पूर्णलाई धन्यवाद दिँदै स्वास्थ्य प्रवर्द्धनमा सबैको सहकार्य आवश्यक रहेको बताए।
कार्यक्रमको सञ्चालन जनस्वास्थ्य निरीक्षक नवीन मिश्रले गर्दै शिविरमा उल्लेखनीय सेवा प्रदान गर्नु भएका बिएण्डसी अस्पतालका स्वास्थ्यकर्मीहरूलाई सम्मान पत्र प्रदान गर्दै गाउँपालिकाको तर्फबाट बिएण्सी टिचिङ्ग हस्पिटल परिवारलाई हार्दिक धन्यवाद तथा कृतज्ञता प्रकट गर्दै कार्यक्रम समापन गरिएको छ।
