कचनकवल, झापा । कचनकवल गाउँपालिकामा हाडजोर्नी तथा नशा सम्बन्धी समस्या भएका नागरिकका लागि निशुल्क स्वास्थ्य परीक्षण तथा औषधि वितरण शिविर संचालन हुने भएको छ। गाउँपालिका अध्यक्ष श्री कालेन्द्र प्रसाद सिंह राजबंशीको समन्वय र सहकार्यमा, रोटरी क्लब अफ भद्रपुर तथा ललितपुर साथै नेपाल अपांग संघ खगेन्द्र नवजीवन केन्द्र झापा शाखाको संयुक्त आयोजनामा शिविर सञ्चालन गरिनेछ।
शिविर यहि मिति २०८१ साल चैत ११ र १२ गते कचनकवल गाउँपालिकाको स्वास्थ्य चौकी घेराबारी मा आयोजना गरिने छ। उक्त शिविरमा नेपाल अर्थोपेडिक अस्पताल, जोरपाटीका वरिष्ठ हाडजोर्नी विशेषज्ञहरूले नशा तथा हाडजोर्नी सम्बन्धी रोगबाट पीडित नागरिकहरूको निःशुल्क स्वास्थ्य परीक्षण गर्नेछन् साथै आवश्यक औषधि वितरण गरिनेछ।
स्वास्थ्य शाखा, कचनकवल गाउँपालिकाले यस शिविरको अवसर लिन सम्पूर्ण सेवाग्राहीलाई तोकिएको समयमा नाम दर्ता गरि सहभागिता जनाउन अनुरोध गरेको छ। साथै, यो महत्वपूर्ण सूचना सबैमा फैलाउन आग्रह गरिएको छ।
