झापा - कचनकवल गाउँपालिकाको प्रमुख व्यापारिक केन्द्र मानिने बनियानी बजारमा अब ब्यवस्थित र स्वस्थकर माछामासु बिक्री वितरण गरिने भएको छ। लामो समयदेखि अव्यवस्थित रूपमा सडकछेउमै प्लास्टिक र पुराना सामग्रीको प्रयोग गरी व्यवसाय सञ्चालन हुँदै आएकोमा बनियानी बजार ब्यवस्थापन समितिले आजदेखि आधुनिक बधशाला सञ्चालनमा ल्याएको छ।
बनियानी बजार व्यवस्थापन समितिका अध्यक्ष हरि बुढाथोकीका अनुसार, अबदेखि सबै माछामासु व्यवसायीले नयाँ बधशालाबाट मात्रै बिक्री वितरण गर्नुपर्नेछ। यसले बजारलाई सफा र व्यवस्थित बनाउन सहयोग गर्नुका साथै उपभोक्ताले गुणस्तरीय तथा स्वस्थकर मासु उपभोग गर्न पाउनेछन्। उक्त माछामासु बिक्री केन्द्रको उद्घाटन कचनकवल गाउँपालिकाका अध्यक्ष कालेन्द्र प्रसाद सिंह राजवंशी र उपाध्यक्ष नवराज भट्टराईले संयुक्त रूपमा गरेका हुन्।
यसैबीच, होली पर्वको अवसरमा कचनकवल गाउँपालिकाले परम्परागत पेशाको जगेर्ना गर्दै मानव विकास सूचकलाई माथि उठाउने पहलस्वरूप ६ कुमाले परिवारलाई इलेक्ट्रोनिक चर्खा निशुल्क हस्तान्तरण गरेको छ। स्थानीय कुमाले समुदाय वर्षौंदेखि माटोका भाडाकुँडा निर्माण गर्दै आए पनि आधुनिकताको प्रभावले नयाँ पुस्ता यो पेशाबाट विमुख हुँदै गएकाले, गाउँपालिकाले प्रविधिमैत्री उपकरण हस्तान्तरण गरेको हो।
कचनकवल वडा नं. ७ का ६ कुमाले परिवारलाई गाउँपालिका अध्यक्ष कालेन्द्र प्रसाद सिंह राजवंशी, उपाध्यक्ष नवराज भट्टराई, वडाध्यक्ष भरत राजवंशी,वडाध्यक्ष चिन्तामणी खरेल तथा समाजसेवी हरि सिग्देलको उपस्थितिमा आधुनिक चर्खा हस्तान्तरण गरिएको हो। ५० वर्षभन्दा पुरानो परम्परागत पेशालाई प्रविधिसँग जोड्दै संरक्षण गर्ने स्थानीय सरकारको प्रयासप्रति कुमाले समुदायले खुशी व्यक्त गरेका छन्।
स्थानीय सरकारको यस्ता पहलहरूले बजार व्यवस्थापनमा सुधार ल्याउने र मौलिक संस्कृतिको जगेर्ना गर्दै स्थानीय जनताको आर्थिक स्तर उकास्न टेवा पुर्याउने विश्वास गरिएको छ।
