बनियानी , झापा - कचनकवल गाउँपालिकाले पहिलोपटक विद्यालयको खातामा मासिक तलब समयमै पठाउने व्यवस्था मिलाएको छ। माघ महिनाबाट लागु गरिएको यो व्यवस्थाले गाउँपालिकाभित्रका शिक्षकहरूलाई ठ्याक्कै कहिले तलब पाउने भन्ने अन्योल हटाएको छ।
गाउँपालिकाका प्रमुख प्रशासकीय अधिकृत स्काई पोखरेलले प्रअ.बैठकमा आफ्नो बिचार राखेसँगै माघ महिनादेखि प्रत्येक महिनाको अन्तिममा विद्यालयको खातामा तलब निकासा हुन थालेको छ। शिक्षा अधिकृत मनिता बरालले विद्यालयहरूले प्रत्येक महिनाको २० गतेभित्र माग फाराम बुझाइसक्नुपर्ने र महिनाको अन्त्यसम्ममा तलब विद्यालयको खातामा जम्मा भइसकेको हुनुपर्ने जानकारी दिइन्।
यसअघि तलब निकासा गर्न कुनै निश्चित समयसीमा नहुँदा शिक्षकहरू अन्योलमा पर्ने गरेका थिए। गाउँपालिकाले पठाएको रकम विद्यालयको खातामा जम्मा भए पनि प्रधानाध्यापकहरूले पुनः शिक्षकको खातामा पठाउन झण्डै एक साता लाग्ने गरेको थियो। विशेष गरी लेखापाल नभएका आधारभूत विद्यालयका प्रधानाध्यापकहरूका लागि तलब निकासा अतिरिक्त बोझ बन्ने गरेको थियो। कतिपय विद्यालयमा प्रधानाध्यापकको ‘मुड’ अनुसार मात्र शिक्षकहरूले तलब पाउने अवस्था थियो।
पथरिया मावि पथरियाका शिक्षक नेपालका अनुसार शिक्षकहरूले पारिश्रमिक लिन प्रधानाध्यापकको भर पर्नुपर्ने अवस्था अझै केही विद्यालयमा रहेको छ। उनले भने, "यदि पालिकाले सोझै शिक्षकहरूको बैंक खातामा तलब निकासा गर्ने व्यवस्था मिलायो भने सबै शिक्षकहरू खुसी हुनेछन्।" उनले पहिलोपटक विद्यालयको खातामा मासिक तलब भुक्तानी गरिदिएकोमा गाउँपालिकालाई धन्यवाद दिएका छन्।
लक्ष्मी मावि बनियानीका प्रधानाध्यापक सुकदेव पोखरेलले यो व्यवस्था जागिरे जीवनको पहिलो अनुभवको रूपमा रहेको बताए। उनले भने, "जागीरे जीवनको नयाँ अध्याय सुरु भएको छ। अब पालिकाबाट सिधै शिक्षकको खातामा तलब आउने दिन पनि आउने रहेछ, यो सोच्दै खुसी लागिरहेको छ।"
गाउँपालिकाको यो नयाँ व्यवस्थाले शिक्षकहरूको पारिश्रमिक समयमा भुक्तानी हुने सुनिश्चित गरेको छ, जसले शिक्षकहरूको मनोबल बढाउने विश्वास गरिएको छ। पालिकाले आगामी दिनमा शिक्षकहरूको खातामा सोझै तलब निकासा गर्ने प्रणाली लागू गर्ने तयारी गरेको छ, जसले अझ सहजता ल्याउने अपेक्षा गरिएको छ।
