बनियानी, झापा – नेपाल शिक्षक महासंघ कचनकवलले गाउँपालिका अध्यक्ष कालेन्द्र प्रसाद सिंह राजवंशीलाई ध्यानाकर्षण पत्र बुझाएको छ। महासंघले विगतमा सरकारसँग भएका विभिन्न सम्झौताहरू कार्यान्वयनको माग राख्दै अध्यक्षसमक्ष ज्ञापनपत्र हस्तान्तरण गरेको हो।
महासंघका अनुसार सरकार र शिक्षक महासंघबीच २०७५ सालको फागुन ९ गते ३० बुँदे, २०७८ सालको फागुन ९ गते ५१ बुँदे तथा २०८० सालमा विभिन्न सहमति भएका थिए। यी सहमति कार्यान्वयन भएमा स्थायी, अस्थायी, करार, राहत, साविक उमावि, बालकक्षा, विशेष शिक्षा, शिक्षण सिकाइ अनुदान लगायत सम्पूर्ण शिक्षक तथा विद्यालय कर्मचारीका मुख्य समस्या समाधान हुने महासंघको विश्वास रहेको छ।
तर, हालसम्म ती सहमति कार्यान्वयन नभएको भन्दै महासंघले केन्द्रीय सर्कुलरअनुसार देशभरका स्थानीय सरकार प्रमुखहरूको ध्यानाकर्षण गराएको हो। महासंघले सरकारले अध्यादेशमार्फत विगतका सम्झौता उल्ट्याउँदै शिक्षक तथा विद्यालय कर्मचारीका माग सम्बोधन नगर्ने षड्यन्त्र गरिरहेको ठहरसमेत गरेको छ। त्यसैले, महासंघले देशभरका स्थानीय सरकारलाई ज्ञापनपत्र बुझाएर तदारुकता अपनाउन आग्रह गरेको छ।
ध्यानाकर्षण पत्र बुझ्दै अध्यक्ष कालेन्द्र प्रसाद सिंह राजवंशीले मुलुकको शैक्षिक क्षेत्रमा सुधारका लागि सरकारले कुनै कसर बाँकी नराखी माग सम्बोधन गर्नुपर्ने बताए। उनले विगतदेखि थाती रहेका विषयमा सरकार संवेदनशील भई स्पष्ट दृष्टिकोणका साथ निर्णय गर्नुपर्ने धारणा राखे।
अध्यक्ष राजवंशीले शिक्षकका विविध समस्याबारे आफू जानकार रहेको उल्लेख गर्दै स्थानीय सरकार आफ्नो स्तरबाट सकेजति पहल गर्न प्रतिबद्ध रहेको बताए।
ज्ञापनपत्र :
