बनियानी । झापाको कचनकवल गाउँपालिका-३ स्थित दल्कीमा बिहीबार बिहान भएको स्कुल बस दुर्घटनाले शैक्षिक संस्थाको लापरबाहीप्रति गम्भीर प्रश्न उठाएको छ। प्रारम्भिक विवरणले बस चालकको असावधानी र विद्यालयको सुरक्षा व्यवस्थामा कमजोरी देखिएको संकेत गरेको छ।
२०८३ वैशाख १७ गते बिहान करिब ९:२५ बजे अभिमुक्तरेश्वर सामुदायिक वन अगाडि दल्की भित्री सडक खण्डमा विद्यापाणि सेकेन्डरी स्कुलको प्र १-०१-००१ ख ४४८२ नम्बरको बसले घरबाट मुख्य सडकमा निस्कँदै गरेको मोटरसाइकल (प्र १-०१-०१३ प ३४०३)लाई ठक्कर दिएको थियो। ठक्करपछि बस अनियन्त्रित भई सडकमा पल्टिएको प्रहरीको भनाइ छ, जसले चालकको लापरबाही मात्र होइन, सवारी सञ्चालनमा विद्यालयले अपनाउनुपर्ने सावधानीमाथि समेत प्रश्न उठाएको छ।
दुर्घटनामा ५२ वर्षीय मोटरसाइकल चालक ओमप्रसाद तिमसिना घाइते भएका छन्। उनको टाउको, मुख र बायाँ खुट्टामा चोट लागेको भए पनि अवस्था सामान्य रहेको र उनी बोल्न सक्ने अवस्थामा छन्।
बसमा सवार करिब १८-२० विद्यार्थीमध्ये १० जना घाइते भएका छन्। घाइतेहरूमा अभिषेक राजवंशी, अर्जुन राजवंशी, धर्मेन्द्र राजवंशी, खुशबु श्रेष्ठ, करण राजवंशी, प्रतीक्षा राजवंशी, वर्तिका राजवंशी, सुमन राजवंशी, सिर्जना राजवंशी र दिपेन राजवंशी रहेका छन्। उनीहरूको उपचार मनमोहन अस्पताल मा भइरहेको छ। अधिकांश विद्यार्थीको अवस्था सामान्य रहे पनि टाउको तथा हातखुट्टामा चोट लागेको छ।
दुर्घटनापछि बस चालक फरार हुनु झन् गम्भीर विषय बनेको छ। यसले चालकको जिम्मेवारीहीनता मात्र नभई विद्यालय प्रशासनले चालक छनोट, प्रशिक्षण र निगरानीमा गरेको लापरबाही उजागर गरेको देखिन्छ।
प्रहरीले दुर्घटनाग्रस्त बस र मोटरसाइकल नियन्त्रणमा लिएर अनुसन्धान अघि बढाएको छ। तर, विद्यालयले विद्यार्थी बोक्ने सवारी साधनमा अपनाउनुपर्ने सुरक्षा मापदण्ड, चालकको योग्यता र नियमित अनुगमनमा गम्भीर कमी हुँदा यस्तो घटना भएको स्थानीयको आरोप छ।
यो घटनाले निजी तथा सामुदायिक विद्यालयहरूले सञ्चालन गर्ने सवारी सेवामा कडाइका साथ सुरक्षा नीति लागू गर्नुपर्ने आवश्यकता पुनः एकपटक उजागर गरेको छ। बालबालिकाको सुरक्षामा हुने सानो लापरबाहीले पनि ठूलो दुर्घटनाको रूप लिन सक्ने भएकाले सम्बन्धित निकायको ध्यान तत्काल जान आवश्यक देखिन्छ।
