काठमाडौं । सत्ता र उत्तरदायित्वबीचको तनाव पुनः एकपटक सतहमा आएको छ। सुधन गुरुङले गृहमन्त्री पदबाट राजीनामा दिएका छन्। विवादित व्यवसायीसँगको सेयर कारोबारमा संलग्न भएको आरोपले घेरिएपछि उनले प्रधानमन्त्री बालेन्द्र शाह समक्ष राजीनामा बुझाएका हुन्।
गुरुङले आफ्नो निर्णयबारे सामाजिक सञ्जालमार्फत सार्वजनिक गर्दै नैतिक उत्तरदायित्व वहन गर्ने संकेत दिएका थिए। प्रधानमन्त्री शाहले पदभार सम्हालेकै दिन मन्त्रिपरिषद् गठन गर्दा गुरुङलाई गृहमन्त्री नियुक्त गरिएको थियो, जसले प्रारम्भिक चरणमै प्रशासनिक कडाइको सन्देश दिएको थियो। उच्च पदस्थ कर्मचारीमाथि गरिएको कारबाहीका कारण उनी सुरुवाती दिनमा चर्चाको केन्द्रमा थिए।
तर पछिल्ला दिनहरूमा भने उनीमाथि लागेको आर्थिक लेनदेनसम्बन्धी विवादले राजनीतिक विश्वसनीयतामाथि प्रश्न उठाएको थियो। स्रोतका अनुसार, रवि लामिछाने सँगको परामर्शपछि गुरुङले राजीनामाको निर्णय लिएका हुन्।
