बनियानी - कचनकवल गाउँपालिका अन्तर्गत सञ्चालित संस्थागत विद्यालयहरूको छाता संगठन KPABSAN ले शिक्षा व्यवस्थापनसँग सम्बन्धित बहुआयामिक विषयहरू उठाउँदै गाउँपालिकाको ध्यान औपचारिक रूपमा आकर्षित गरेको छ। २०८३ साल बैशाख ७ गते सम्पन्न संगठनको बैठकले लिएको निर्णयअनुसार, विद्यालयहरूले प्रस्ताव गरेका शुल्क संरचनालाई सम्बन्धित विद्यालयमै प्रत्यक्ष अनुगमन गरी विधिसम्मत रूपमा पारित गरिदिन गाउँपालिकासमक्ष आग्रह गरिएको छ।
ज्ञापनपत्रमार्फत संगठनले वर्तमान शैक्षिक अवस्थाप्रति गम्भीर चिन्ता व्यक्त गर्दै विशेषतः माध्यमिक तहको शिक्षामा संघीय सरकारद्वारा गरिएको प्रत्यक्ष हस्तक्षेपप्रति असहमति जनाएको छ। वैशाख १५ गतेदेखि भर्ना अभियान सञ्चालन र वैशाख २१ गतेदेखि कक्षा प्रारम्भ गर्न दिइएको निर्देशनप्रति प्रश्न उठाउँदै KPABSAN ले यस्तो निर्णय संघीयताको मूल मर्मविपरीत भई स्थानीय तहको अधिकार क्षेत्रमा हस्तक्षेप भएको दाबी गरेको छ।
विद्यार्थीहरूको मनोवैज्ञानिक अवस्था र सिकाइ निरन्तरतामा परेको प्रभावलाई समेत संवेदनशील ढंगले उठाउँदै संगठनले लामो समयसम्म घरमै सीमित रहनुपरेको अवस्थाले शिक्षण-सिकाइ प्रक्रियामा गम्भीर असर पारेको उल्लेख गरेको छ। यस परिप्रेक्ष्यमा, विद्यालय सञ्चालनका लागि उपयुक्त वातावरण निर्माण गर्न स्थानीय सरकारको सक्रिय पहल अपरिहार्य रहेको धारणा प्रस्तुत गरिएको छ।
साथै, गाउँपालिका कार्यसमितिको बैठक यथाशीघ्र आह्वान गरी समन्वयात्मक र यथार्थपरक निर्णयमार्फत विद्यालय सञ्चालनलाई सहज बनाउन संगठनले आग्रह गरेको छ।
KPABSAN का पदाधिकारीहरूले उक्त ज्ञापनपत्र गाउँपालिका अध्यक्ष कालेन्द्र प्रसाद सिंह राजवंशीसमक्ष हस्तान्तरण गर्दै निजी विद्यालय क्षेत्र स्थानीय तहसँग सहकार्य गर्दै शिक्षण गतिविधिलाई नियमित, व्यवस्थित र प्रभावकारी रूपमा अघि बढाउने प्रतिबद्धता समेत व्यक्त गरेका छन्।
