झापा - पूर्वी नेपालको बुद्धशान्ति गाउँपालिका-४, टिमाई शिविर नजिकै मकैबारीमा देखिएको एक दुर्लभ निगाले चितुवाको भीडद्वारा निर्ममतापूर्वक हत्या गरिएको घटनाले गम्भीर चिन्ता र आक्रोश उत्पन्न गरेको छ।
वन विभाग र प्रहरीको संयुक्त टोलीले चितुवालाई सुरक्षित रूपमा नियन्त्रणमा लिन ‘डार्ट’ प्रहार गरी बेहोस बनाउने प्रक्रिया सुरु गरिसकेको संवेदनशील अवस्थामै केही स्थानीय व्यक्तिहरूको उत्तेजित भीडले लाठी प्रहार गर्दै चितुवाको ज्यान लिएको प्रारम्भिक विवरण सार्वजनिक भएको छ।
उक्त घटनाले सुरक्षाकर्मी र प्राविधिक टोलीको उपस्थितिमै कानुनलाई खुला चुनौती दिइएको देखिएको छ। संरक्षित वन्यजन्तुको सुरक्षामा राज्य संयन्त्र सक्रिय हुँदाहुँदै, यस्तो अमानवीय गतिविधि हुनु समाजको चेतना र विधिको शासनमाथि नै गम्भीर प्रश्न उठाउने खालको छ।
राष्ट्रिय निकुञ्ज तथा वन्यजन्तु संरक्षण ऐन, २०२९ अनुसार चितुवा मार्नु गम्भीर फौजदारी अपराध हो, जसअन्तर्गत ५ देखि १५ वर्षसम्म कैद र १० लाख रुपैयाँसम्म जरिवाना हुन सक्ने प्रावधान छ। यद्यपि, यति कडा कानुनी व्यवस्था हुँदाहुँदै पनि घटनास्थलमै कानून उल्लंघन हुनु चिन्ताजनक देखिन्छ।
सामाजिक सञ्जालमा सार्वजनिक भएका भिडियोहरूका आधारमा संलग्न व्यक्तिहरूको पहिचान गरी तत्काल कानुनी दायरामा ल्याउनुपर्ने माग व्यापक रूपमा उठिरहेको छ। साथै, यस्ता घटनाले वन्यजन्तु संरक्षण, मानव-वन्यजन्तु द्वन्द्व व्यवस्थापन तथा जनचेतना अभिवृद्धिको आवश्यकता अझ गम्भीर रूपमा उजागर गरेको छ।
घटनाबारे थप अनुसन्धानका लागि विज्ञ टोली परिचालित भइसकेको जनाइएको छ। सम्बन्धित निकायले निष्पक्ष छानबिन गरी दोषीलाई कानुनी कारबाहीको दायरामा ल्याउने अपेक्षा गरिएको छ।
