पथरिया । सुकुनाडिगी खानेपानी उपभोक्ता समितिद्वारा वितरण हुँदै आएको खानेपानी सेवा विगत तीन दिनदेखि अवरुद्ध हुँदा पथरिया क्षेत्रका उपभोक्ता काकाकुल बन्न पुगेका छन्। विशेषतः नयाँ बजार आसपासका बासिन्दा आधारभूत आवश्यकताबाट वञ्चित भई दैनिक जीवन नै प्रभावित भएको अवस्था छ।
स्थानीयस्तरमै सञ्चालन गरिएको कम्पाउण्ड फाउन्डेसन खन्ने क्रममा जेसिबी प्रयोग गर्दा मुख्य खानेपानी पाइप फुटेपछि समस्या उत्पन्न भएको हो। घटनाले एक साधारण पूर्वजानकारी र न्यूनतम सतर्कता अभावले कसरी सामुदायिक संरचनामा गम्भीर असर पार्न सक्छ भन्ने तथ्य पुनः उजागर गरेको छ।
घर अगाडि बिच्छ्याइएको खानेपानी पाइपको अस्तित्वप्रति सामान्य विवेकसमेत नपुर्याई गरिएको उत्खननलाई स्थानीयले गैरजिम्मेवार र विवेकहीन क्रियाकलापको रूपमा लिएका छन्। पूर्वसूचना, समन्वय र सावधानीजस्ता आधारभूत प्रक्रियालाई बेवास्ता गर्दा सार्वजनिक सेवामाथि प्रत्यक्ष क्षति पुगेको देखिन्छ।
यसैबीच, उपभोक्ता समितिका अध्यक्ष बासु भट्टराईका अनुसार पाइप मर्मतका लागि आवश्यक सामग्री धरानबाट आज आइपुग्ने क्रममा रहेको छ। उनले सम्भव भएसम्म आजैदेखि खानेपानी सेवा पुनः सुचारु गरिने जानकारी दिएका छन्।
यो घटनाले निर्माणका नाममा गरिने निर्माण कार्यहरूमा न्यूनतम उत्तरदायित्व र प्राविधिक संवेदनशीलता अपरिहार्य रहेको सन्देश दिएको छ। सार्वजनिक पूर्वाधारप्रति लापरवाहीले क्षणिक फाइदा दिन सक्छ, तर त्यसको दीर्घकालीन मूल्य आम नागरिकले चुकाउनु पर्ने यथार्थ पुनः पुष्टि भएको छ।
