झापा । नेपाल प्रहरीको लागुऔषध नियन्त्रण अभियान थप सशक्त बन्दै गएको संकेतस्वरूप झापा जिल्लामा ठूलो परिमाणको लागुऔषधसहित एक व्यक्तिलाई नियन्त्रणमा लिइएको छ।
मिति २०८२ साल ०९ महिना २२ गते दिउँसो करिब १३:३० बजे, जिल्ला झापा बिर्तामोड नगरपालिका–१, सूर्यनगर टोलस्थित काली मन्दिर नजिक बसोबास गर्दै आएका वर्ष ४० का अजय राजवंशीको घरको कोठामा लागुऔषध कारोबार भइरहेको भन्ने विशेष सूचनाका आधारमा प्रहरीले छापा मारेको हो।
इलाका प्रहरी कार्यालय अनारमनीबाट खटिएको प्रहरी निरीक्षक प्रवीण श्रेष्ठको नेतृत्वमा रहेको टोली र लागुऔषध नियन्त्रण ब्युरो काकडभिट्टाबाट खटिएको संयुक्त टोलीले घरको कोठा तथा शरीर खानतलासी गर्दा लागुऔषध ब्राउन सुगर जस्तो देखिने खैरो लिसाइलो पदार्थ फेला पारेको प्रहरीले जनाएको छ।
डिजिटल तराजुमा तौल गर्दा उक्त पदार्थ प्लास्टिकसहित १३१ ग्राम ३६० मिलिग्राम र प्लास्टिक बाहेक १२३ ग्राम १८० मिलिग्राम रहेको पुष्टि भएको छ। साथै, घटनास्थलबाट नेपाली नगद रु. २ लाख ६७ हजार, भारतीय नगद रु. २९ हजार ५००, डिजिटल तराजु १ थान, कैँची १ थान, चक्कु १ थान तथा मोबाइल फोन २ थान समेत बरामद गरिएको छ।
बरामद सामग्रीसहित अजय राजवंशीलाई नियन्त्रणमा लिई इलाका प्रहरी कार्यालय अनारमनीमा थप अनुसन्धान भइरहेको प्रहरीले जानकारी दिएको छ।
लागुऔषध जस्तो सामाजिक विकृतिविरुद्ध नेपाल प्रहरीले सूचनामा आधारित कारबाहीलाई तीव्र बनाउँदै गएको यो घटनाले देखाएको छ। प्रहरीको यस्तो सक्रियताले समुदायलाई सुरक्षित बनाउने मात्र होइन, युवा पुस्तालाई लागुऔषधको दलदलबाट जोगाउने महत्वपूर्ण सन्देश पनि प्रवाह गरेको छ।
