झापा - जिल्ला प्रहरी कार्यालय झापा र लागुऔषध नियन्त्रण ब्यूरो काकडभिट्टाको संयुक्त टोलीले लागूऔषध नियन्त्रणमा पुनः एक सशक्त सफलता हात पारेको छ। विशेष सूचनाको वैज्ञानिक विश्लेषण र सूक्ष्म निगरानीका आधारमा सञ्चालन गरिएको लक्षित कारबाहीले पन्थापडा निवासी वर्ष अन्दाजी २० का अडसाद अलीलाई नियन्त्रणमा ल्याउँदा, स्थानीय सुरक्षा संयन्त्रको विश्वासिलो क्षमता फेरि एकपटक प्रमाणित भएको छ।
बाह्रदशी-राजगढ मार्ग हुँदै चारपानेतर्फ गइरहेको मोटरसाइकल मे ८ प ८१४० लाई टोलीले रोक्दै गरेको साधारण जाँच असल अनुसन्धानको नमुना बनेको छ। चेकजाँचका क्रममा अलीको साथबाट ब्राउन सुगर जस्तो देखिने लिसाइलो पदार्थ पाँच पोका, कुल ६३.०२० ग्राम, बरामद भएपछि उनलाई घटनास्थलमै नियन्त्रणमा लिइएको प्रहरीले जनाएको छ।
यस सफल कारबाहीको केन्द्रीय बिन्दु बनेका छन्-अनुसन्धान अधिकृत विजय चौहान। उनको रणनीतिक सूचनामाथिको पकड, अपराधी गतिविधि पहिचान गर्ने तीक्ष्ण क्षमता र प्राविधिक कार्यशैलीले फेरि पुष्टि गरिदिएको छ-“विजय चौहानको नजर छलेर लागूऔषध कारोबार गर्नेलाई उम्किनु अब सपनामा मात्रै सम्भव छ।”
सीमावर्ती क्षेत्रमा फैलिएको आपराधिक सञ्जाललाई नजिकबाट बुझ्ने उनको कौशल र जोखिमपूर्ण क्षेत्रमा देखाएको नेतृत्व-साहस प्रहरी वृत्तभित्र मात्र होइन, स्थानीय समुदायसम्म प्रशंसाका साथ चर्चिएको छ। चौहानको टोलीले पछिल्लो समय संचालन गरेका कारबाहीहरू क्षेत्रीय लागूऔषध नियन्त्रण अभियानका ‘गेम-चेंजर’ का रूपमा देखिएको सुरक्षासम्बद्ध स्रोतहरू बताउँछन्।
फेला पारिएको पदार्थको वैज्ञानिक परीक्षण, आपराधिक सञ्जाल पहिचान तथा सम्भावित ठूला सप्लायरसम्म पुग्ने उद्देश्यले थप अनुसन्धान जारी रहेको प्रहरीले जनाएको छ। सुरक्षा निकायका अनुसार बढ्दो अवैध कारोबार रोक्न चौहानजस्ता दक्ष अनुसन्धानकर्ताको सक्रियता नै प्रमुख आधार हुने स्पष्ट हुँदै गएको छ।
