झापा । कचनकवल गाउँपालिकाको सामाजिक जीवन, युवा चेतना र सामुदायिक उत्थानमा महत्वपूर्ण योगदान दिएका स्वर्गीय लालध्वज लिम्बूको तेस्रो वार्षिक स्मृतिको अवसरमा कचनकवल स्थित बगान युथ क्लबले यस वर्ष पनि भव्य तथा अर्थपूर्ण सामाजिक सेवामूलक कार्यक्रमको आयोजना गरेको छ।
सेमाङ्ग्ली क्याफे विर्तामोडको मुख्य प्रायोजनमा सञ्चालन हुने गा.पा.-स्तरीय अन्तर-मावि हाजिरीजवाफ प्रतियोगिता तथा न्यानो कपडा वितरण कार्यक्रम-२०८२ आगामी मंसिर ३ गते पथरिया माध्यमिक विद्यालयको प्राङ्गणमा गरिने भएको आयोजकले जानकारी दिएको छ।
कार्यक्रम अन्तर्गत स्व. लालध्वज लिम्बूको प्रेरणादायी योगदानलाई स्मरण गर्दै विद्यार्थीहरूबीच ज्ञान, सीप र प्रतिस्पर्धात्मक क्षमताको प्रवर्द्धन गर्ने उद्देश्यले भव्य रूपमा हाजिरीजवाफ प्रतियोगिता सञ्चालन गरिनेछ। यसले विद्यार्थीहरूमा बौद्धिक विकाससँगै स्वस्थ प्रतिस्पर्धा र नेतृत्व चेतना अभिवृद्धि गर्ने अपेक्षा गरिएको छ।
त्यसैगरी, जाडो यामलाई मध्यनजर गर्दै सामुदायिक विद्यालयका विद्यार्थी तथा स्थानीय विपन्न, असहाय र आवश्यकतामा रहेका बालबालिकालाई लक्षित गरी न्यानो कपडा वितरण अभियान पनि सञ्चालन गरिनेछ। सामाजिक उत्तरदायित्वका रूपमा आयोजित यस कार्यले समुदायमा सकारात्मक ऊर्जा, सहकार्य भावना र सहानुभूतिपूर्ण संस्कारलाई विस्तार गरेको स्थानीय बुद्धिजीवीहरूले बताएका छन्।
बगान युथ क्लब कचनकवलले कार्यक्रमको सफलतापूर्वक सञ्चालनका लागि सबै सहयोगी हातहरूप्रति कृतज्ञता व्यक्त गर्दै आगामी दिनमा पनि सामाजिक सेवा, युवा क्षमताविकास र समुदायप्रति उत्तरदायी कार्यक्रम निरन्तर अघि बढाइने प्रतिबद्धता व्यक्त गरेको छ।
सम्पूर्ण समुदाय, अभिभावक, स्थानीय प्रतिनिधि, शिक्षक, विद्यार्थी तथा शुभेच्छुक साथीहरूलाई मंसिर ३ गते पथरिया माध्यमिक विद्यालयको प्राङ्गणमा निर्धारित कार्यक्रममा सहभागी भई कार्यक्रमलाई भव्य बनाउन हार्दिक आह्वान समेत आयोजकले गर्दै समाजका लागि सानो सहयोग पनि ठूलो परिवर्तनको आधार हुने जनाएको छ।
