काकडभिट्टा । झापाको मेचीनगर नगरपालिका-८ गिरीगाउँबाट प्रहरीले लागूऔषधसहित दुई जनालाई नियन्त्रणमा लिएको छ।
मिति २०८२ भदौ ११ गते दिउँसो १२:३० बजे लागूऔषध नियन्त्रण व्यूरो काँकडभिट्टाबाट प्रहरी नायब निरीक्षक (प्रनानि) कुमार सोमेस लामिछानेको कमाण्डमा खटिएको टोलीले इटाभट्टाबाट सलकपुरतर्फ जाँदै गरेको मे ११ प ४२३३ नम्बरको सुपर स्लेन्डर मोटरसाइकललाई शंका लागी चेकजाँच गर्दा सो क्रममा लागूऔषध बरामद भएको हो।
प्रहरीका अनुसार मोटरसाइकल चालक मेचीनगर-८ बस्ने ३२ वर्षीय अजय मेचे र पछाडि सवार भारत पश्चिम बंगाल, दार्जिलिङ जिल्ला उत्तरा रथखोला नक्सलबारी बस्ने ३० वर्षीय कनकन राह उर्फ ‘टान्टु’ लाई पक्राउ गरिएको छ।
जाँचका क्रममा पछाडि सवार राहले बोकेको कालो प्लास्टिकको झोलामा सेतो प्लास्टिकको एउटा पोका फेला परेको प्रहरीले जनाएको छ। उक्त पोका खोली हेर्दा खैरो हेरोइनजस्तो देखिने पदार्थ फेला परेको र तौल गर्दा १०० ग्राम १०० मिलिग्राम भएको पुष्टि भएको हो।
बरामद लागूऔषधसहित मोटरसाइकललाई समेत नियन्त्रणमा लिएर दुबैलाई इलाका प्रहरी कार्यालय काँकडभिट्टा ल्याई थप अनुसन्धान भइरहेको लागूऔषध नियन्त्रण ब्यूरोले जनाएको छ।
