भैरहवा । रुपन्देही प्रहरीले नक्कली शैक्षिक प्रमाणपत्र प्रकरणमा थप एक व्यक्तिलाई पक्राउ गरेको छ। पक्राउ पर्नेमा चितवन जिल्ला, कालिका नगरपालिका-५ निवासी ५० वर्षीय हरि प्रसाद कँडेल रहेका छन्, जो कलेज कोच नेपाल प्रालिका सञ्चालक तथा राष्ट्रिय स्वतन्त्र पार्टीसँग आबद्ध नेता समेत हुन्।
यसअघि रुपन्देही प्रहरीले नेपाल र भारतका विभिन्न विश्वविद्यालयका हजारौँ नक्कली शैक्षिक प्रमाणपत्र, होलोग्राम, स्ट्याम्प लगायतका सामग्रीसहित भारतीय नागरिक अभिषेक यादवलाई नियन्त्रणमा लिएको थियो। सोही मुद्दामा अनुसन्धानको क्रममा यादवको बयानपछि कँडेलको नाम संलग्न भएको प्रहरीले जनाएको छ।
रुपन्देहीका एसपी प्रदीप बहादुर क्षेत्रीका अनुसार प्रारम्भिक अनुसन्धानले कँडेलको घटनामा केन्द्रीय भूमिका रहेको प्रष्ट भएपछि उनलाई चितवनबाट पक्राउ गरी रुपन्देही ल्याइएको हो। “अनुसन्धानका क्रममा कँडेलको प्रत्यक्ष संलग्नता पुष्टि भएकाले पक्राउ गरिएको हो,” एसपी क्षेत्रीले बताए, “हाल उनलाई सोधपुछ जारी छ र प्रकरणलाई विभिन्न कोणबाट खोतलिँदै छ।”
कँडेलविरुद्ध यसअघि पनि शैक्षिक योग्यताको झुट्टा प्रमाणपत्र पेश गरी भ्रष्टाचार गरेको अभियोगमा अख्तियार दुरुपयोग अनुसन्धान आयोगले २०७९ साल माघ १८ गते विशेष अदालतमा मुद्दा दायर गरेको थियो। सो मुद्दामा विशेष अदालतले २०८० साल फागुन ११ गते उनलाई छ महिनाको कैद सजाय तथा १० हजार रुपैयाँ जरिवाना गर्ने फैसला सुनाइसकेको थियो।
यसरी विगतमा नै शैक्षिक आचरणसम्बन्धी अनियमिततामा दोषी ठहर भइसकेका व्यक्तिको पुनः सोही प्रकृतिको प्रकरणमा संलग्नता देखिनु उच्च शिक्षा क्षेत्रमै नैतिक प्रश्न खडा भएको जनाइएको छ।
अत्यन्त जरुरी सूचना :
