बनियानी - झापा जिल्लाको कचनकवल गाउँपालिका-५ (पाठामारी) का वडा सचिव दिनेश कुमार गणेश सरकारी नम्बर प्लेट अङ्कित मोटरसाइकलमा भारतीय भूमिमा ट्राफिक नियम उल्लंघनसहित देखिएको दृश्य सार्वजनिक भएपछि स्थानीयस्तरमा चर्को बहस सुरु भएको थियोे।
स्थानीय सीमावर्ती भारतीय बजार कादोगाउँमा तीनजना सवार अवस्थामा खिचिएको उक्त दृश्य बाहिरिएपछि धेरैले त्यसलाई प्रशासनिक लापरवाहीको स्पष्ट उदाहरणका रूपमा लिएका थिए। केहीले परिस्थितिजन्य बाध्यता हुनसक्ने अनुमान गरे पनि, काजी खबरले घटनाबारे पटकपटक सम्पर्क गर्दा पनि सचिव गणेशले सार्वजनिक रूपमा आफ्नो धारणा दिन आनाकानी गर्दै आएका थिए।
ट्राफिक नियम उल्लँघनको घटना सार्वजनिक भएपछि इलाका प्रहरी बनियानीका ट्राफिक प्रहरीले सवारी नियम उल्लंघनको आधारमा सचिव गणेशलाई एकपटकलाई सचेत गराउँदै रु ५०० जरिवाना तोकेको र सो जरिवाना सचिवले तिरेको पुष्टि भएको छ। प्रहरी निरीक्षक गणेश पौडेलका अनुसार, "कानुनको उल्लंघन गर्ने छुट कसैलाई छैन। सरकारी कर्मचारी भए पनि कानुनी कारबाहीबाट बच्न सक्दैनन्।"
स्थानीयवासीहरूले सरकारी सवारीसाधनको प्रयोगमा पारदर्शिता अनिवार्य रहेको बताएका छन्। उनीहरूका अनुसार, राज्यको सम्पत्ति जनताको करबाट सञ्चालित हुने भएकाले यसको प्रयोगबारे जवाफदेहिता देखाउनु सरकारी अधिकारीको कर्तव्य हो।
यो घटनाले पुनः एकपटक प्रमाणित गरेको छ - राष्ट्रसेवकको पदमा रहेर कानुन तोड्ने जो कोही पनि अनिवार्य रूपमा दण्डित हुन्छन्।
