कचनकवल, साउन २५ - कचनकवल गाउँपालिकामा श्रावण महिनाको अन्तिम सोमबार पर्ने भुतेश्वर मन्दिर मेलाको अवसरमा यही साउन २६ गते (सोमबार) स्थानीय सार्वजनिक विदा हुने भएको छ।
गाउँ कार्यपालिकाको मिति २०८२ साउन २५ गतेको बैठकले गरेको निर्णयअनुसार प्रत्येक वर्षझैँ यस वर्ष पनि मेलाको दिन पालिका क्षेत्रभरका सबै सार्वजनिक कार्यालय, विद्यालय, स्वास्थ्य संस्था, बैंक तथा गैरसरकारी संस्थामा एक दिन सार्वजनिक विदा दिने व्यवस्था गरिएको हो।
श्रावण महिनाको अन्तिम सोमबार भुतेश्वर शिवालय मन्दिर परिसरमा आयोजित विशेष मेलामा स्थानीय बासिन्दा तथा बाह्य क्षेत्रका भक्तजनको व्यापक सहभागिता हुने परम्परा रहिआएको छ। गाउँपालिकाले मेलाले धार्मिक आस्था, सांस्कृतिक संरक्षण र सामाजिक एकताको सन्देश प्रवाह गर्ने विश्वास व्यक्त गरेको छ।
