बनियानी, साउन २१ - हालै सार्वजनिक भएको माध्यमिक शिक्षा उत्तीर्ण परीक्षा (कक्षा १२) २०८२ को नतिजामा कचनकवल गाउँपालिका अन्तर्गतको लक्ष्मी माविले उत्कृष्ट प्रदर्शन गर्दै गाउँपालिकाभित्रकै सामुदायिक विद्यालयहरूमा अग्रस्थान हासिल गरेको छ।
लक्ष्मी माविबाट कूल ६१ विद्यार्थी परीक्षामा सहभागी भएका थिए, जसमा २४ जना नियमितरूपमा उत्तीर्ण भएका छन्। थप २० जनाले एक विषय र ११ जनाले दुई विषयमा मौका परीक्षा दिने अवसर पाएका छन्। यो आँकडाले ३९ प्रतिशत उत्तीर्ण दर देखाउँछ, जुन कचनकवलभित्रकै सबैभन्दा उच्च हो।
यसैबीच अन्य विद्यालयहरूको नतिजा भने चिन्ताजनक देखिएको छ। 
समाचार प्रयोजनका लागि सम्बन्धित विद्यालयका शिक्षक मार्फत तथ्यांक माग्दा पथरिया मावि र देवकोटा माविका प्रशासनहरूले आधिकारिक विवरण दिन अस्वीकार गरे। अनौपचारिक स्रोतका आधारमा परिक्षाफल बुझ्दा पथरिया माविको उत्तीर्ण दर ३१ प्रतिशत, देवकोटा माविको २४ प्रतिशत र मोति माविको प्रशासनले उपलब्ध गराएको तथ्यांक अनुसार १७ प्रतिशत रहेको बुझिएको छ।
कचनकवल वडा नं. २ स्थित देवकोटा माविमा सबैभन्दा धेरै विद्यार्थी भए पनि त्यसको शैक्षिक नतिजा लगातार खस्कँदो क्रममा छ। स्थानीय अभिभावकहरू विद्यालयको कमजोर नतिजाबाट निराश छन्। उनीहरूका अनुसार शिक्षक, व्यवस्थापन समिति र प्रशासनबीच समन्वयको अभाव र स्पष्ट जिम्मेवारी तोक्ने नेतृत्वको कमीले विद्यालयको प्रदर्शन प्रभावित भएको हो।
अझ गम्भीर पक्ष के देखिन्छ भने, पथरिया र देवकोटा माविका प्रशासनहरूले परीक्षाफल सम्बन्धी आधारभूत जानकारीसमेत सार्वजनिक गर्न इन्कार गरेका छन्। यसले विद्यालय प्रशासनमा पारदर्शिता नहुनुका साथै सूचना प्रवाहप्रतिको गैरजिम्मेवार प्रवृत्तिको संकेत गर्दछ। यस्ता व्यवहारले प्रशासनिक असक्षमताको पुष्टि गर्नुका साथै सुधार प्रक्रियालाई कमजोर बनाउने खतरा बोकेको छ।
सामुदायिक विद्यालयहरूको समग्र शैक्षिक सुधारका लागि संरचनागत परिवर्तन, पारदर्शी प्रणाली र नेतृत्वदायी सोच आवश्यक देखिएको छ। लक्ष्मी माविको हालको प्रदर्शन भने अन्य विद्यालयका लागि प्रेरणादायी उदाहरण बन्ने निश्चित छ - शर्त केबल एउटै हो, इमानदार नेतृत्व र समन्वययुक्त प्रयास।
