झापा, २०८२ साउन १९ । झापा गाउँपालिका-३ मा भएको चाँदीका गरगहना चोरीको घटनामा संलग्न दुई युवकलाई प्रहरीले पक्राउ गरेको छ ।
मिति २०८२ साउन १४ गते दिउँसो करिब १ बजे लरेश मुर्मुको घरबाट विभिन्न किसिमका चाँदीका गरगहना चोरी भएको जानकारी पाएपछि प्रहरी चौकी टाघनडुब्बाबाट खटिएको टोलीले अनुसन्धान प्रारम्भ गरेको थियो ।
अनुसन्धानको क्रममा झापा गाउँपालिका-३ निवासी १९ वर्षीय निर्मल बराईली र सोही ठाउँका १९ वर्षीय दिपेश रसाईलीलाई साउन १८ गते पक्राउ गरिएको जिल्ला प्रहरी कार्यालयले जनाएको छ । पक्राउ परेका अभियुक्त निर्मल बराईलीको घरबाट चोरीका सामग्रीहरू चुरा (बाला) १ जोर, चाँदीको कल्ली १ जोर, चाँदीको बिच्छी (सिक्री) १ थान, पाउजु १ थान, चाँदीको सिक्री १ थान र चाँदीको औँठी ३ थान बरामद गरिएको प्रहरी स्रोतले जनाएको छ ।
बरामद सामग्रीसहित दुवै प्रतिवादीलाई आवश्यक कानुनी प्रक्रिया पश्चात मिति २०८२ साउन १९ गते झापा जिल्ला अदालतबाट पाँच दिनको म्याद थप गरी अनुसन्धान प्रक्रिया अगाडि बढाइएको जिल्ला प्रहरी कार्यालय भद्रपुरले जनाएको छ ।
