कचनकवल । विद्यालय शिक्षा ऐन नल्याएसम्म सडकमै रहने अडानसहित नेपाल शिक्षक महासंघको आन्दोलन झनै चर्किएको छ। राजधानी काठमाडौंमा जारी आन्दोलनमा सहभागिता जनाउन कचनकवलबाट थप ३० जना शिक्षक प्रस्थान गरेका छन्। शिक्षक महासंघको आह्वानमा देशभरका शिक्षकहरू विद्यालय शिक्षा विधेयकको विरोधमा आन्दोलनरत छन्।
यसअघि विभिन्न जिल्लाबाट सयौं शिक्षक राजधानी पुगिसकेका छन्। उनीहरूको मुख्य माग भनेकै संसद्को हिउँदे अधिवेशनबाट विद्यालय शिक्षा ऐन पारित गर्नु हो। यसै मागलाई लिएर महासंघले पहिलो चरणमा विरोध प्रदर्शन, ध्यानाकर्षण पत्र बुझाउने, अन्तरक्रिया कार्यक्रम सञ्चालनजस्ता गतिविधिहरू अघि बढाएको छ।
शिक्षकहरूको आन्दोलनले देशभरका विद्यालयहरू प्रभावित भएका छन् भने विद्यार्थीहरूको पठनपाठनमा गम्भीर असर परेको छ। यता, सरकार र महासंघबीच वार्ता भइरहे पनि सरकारको गम्भीरता नदेखिएपछि समाधान अझै निस्किएको छैन।
महासंघले चेतावनी दिँदै भनेको छ, “नयाँ शिक्षा ऐन नआउन्जेल आन्दोलन फिर्ता हुँदैन, सडकमै रहने हाम्रो एकमात्र विकल्प हो।”
शिक्षा क्षेत्रको सुधारका नाममा बनेको विधेयकप्रति असन्तुष्टि जनाउँदै आएको महासंघको यो अडानसँगै अबको राजनीतिक तथा शैक्षिक अवस्था कता मोडिन्छ भन्ने चासो बढ्दो छ।
