बनियानी । झापा जिल्लाको कचनकवल गाउँपालिका भित्र भन्सार छलीका लत्ताकपडा लगायतका विभिन्न सामाग्री भारतबाट अवैध रूपमा भित्रिने गरेको तथ्य पुनः सार्वजनिक भएको छ।
स्थानीय नागरिकहरूका अनुसार केचना, दल्लेगाउँ, पाठामारी लगायतका सीमावर्ती नाकाहरू हुँदै लामो समयदेखि कपडा लगायतका विभिन्न सामाग्री तस्करी भइरहेको भए पनि अहिलेसम्म प्रमुख कारोबारीहरू पक्राउ नपर्नु सुरक्षाकर्मीहरूको भूमिकामाथि गम्भीर प्रश्न खडा भएको बताउँछन्।
आज बिहानैदेखि सशस्त्र प्रहरी बल बिओपी केचनाका इन्स्पेक्टर सागर राई र इलाका प्रहरी कार्यालय बनियानीका प्रहरी निरीक्षक रोहित बहादुर मगरको नेतृत्वमा खटिएको सुरक्षाकर्मीहरूको बाक्लो उपस्थिति रहेको थियो। बनियानी चौक तथा बजार प्रवेश गर्ने स्थानहरूमा कडा निगरानी राखिएको देखिए पनि राति २ बजेपछि मोटरसाइकल र पिकअप भ्यान प्रयोग गरी ब्यापारीको बाक्लो आवतजावत भएको स्थानीयहरूले बताएका छन्।
स्थानीय बासिन्दाहरूले सुरक्षाकर्मीहरूकै मिलेमतोमा लामो समयदेखि अवैध कपडा लगायतका विभिन्न सामाग्री ओसारपसार भइरहेको आरोप लगाएका छन्। प्रहरीको आकस्मिक सक्रियताले शंका उत्पन्न गरेको छ, किनकि यसअघि नियमित गस्ती हुँदा समेत कुनै कारबाही नहुँदा अब मात्र निगरानी बढाउनु 'मञ्चन गरिएको कारबाही' जस्तो देखिएको स्थानीयहरूको भनाइ छ।
लक्ष्मी क्याम्पस बनियानीका विद्यार्थीहरूले बिहान ७ बजेतिर क्याम्पसको खेलमैदान हुँदै बोरामा कपडा ढुवानी भइरहेको दृश्य देखेका दाबी गरेका छन्। उनीहरूका अनुसार करिब १० पटकभन्दा बढी यस्ता गतिविधिहरू दोहोरिएका थिए।
सुरक्षाकर्मीहरू भने बनियानीका कपडा व्यापारी अरुण शाहले अवैध रूपमा भन्सार छलिका कपडा भित्र्याएको सूचना पाएपछि राजस्व अनुसन्धान कार्यालय इटहरीलाई खबर गरिएको बताउँछन्। राजस्व अनुसन्धान अधिकृत नवीन कार्कीका अनुसार उक्त व्यापारीको कोठामा आवश्यक बिल लगायतका कागजात लिएको र शँकास्पद माथिल्लो तलामा रहेको कोठामा भाडावाल बस्ने भएकाले चाबी उपलब्ध नभएको बताएका कारण लाहाछाप लगाएर शिलबन्दी गरिएको बताएका छन्।
स्थानीय नागरिकहरू भने सुरक्षाकर्मीहरूको भूमिकालाई शंकास्पद ठहर गर्दै यो घटनाको निष्पक्ष र गहिरो छानबिन हुनुपर्ने माग राखिरहेका छन्। यदि अरुण शाह लगायतका व्यक्तिहरू निरन्तर अवैध कपडाको कारोबारमा संलग्न छन् भने उनीहरूलाई संरक्षण दिनेहरू को हुन् भन्ने प्रश्न पनि उठेको छ। कारोवारीले अवैध सामाग्री बजार बाहिरका गाउँमा गोदाम बनाउने तर बजारमा अनुसन्धान गरेको देखाउनु सुरक्षाकर्मीको 'हात्तीका देखाउने र चपाउने दाँत' जस्तै देखिएको स्थानीयको आरोप छ।
बिहानैदेखि अनुसन्धानमा खटिएको प्रहरी र राजस्व अनुसन्धानको टोलीले घटनाको उच्च अनुसन्धान गरि अवैध कारोबारमा सँलग्न भेटिए कस्तो कारबाही अगाडि बढाउनेछ भन्ने हेर्न बाँकी छ।
