काठमाडौं । भाटभटेनी सुपरमार्केटले आफ्नो बहादुरी प्रदर्शन गर्दै लुटेराहरूलाई पराजित गरेका सुरक्षा गार्ड दुलप्रसाद पराजुलीलाई विशेष सम्मानसहित पुरस्कृत गरेको छ।
गत चैत १५ गते राजावादीहरूको आन्दोलनका क्रममा भाटभटेनी सुपरमार्केट लुट्ने प्रयास भएपछि सुरक्षा गार्ड पराजुलीले अदम्य साहस देखाउँदै लुटेराहरूलाई भगाएका थिए। सामाजिक सञ्जालमा भाइरल भएको सो घटनापछि आज भाटभटेनीले एक भव्य कार्यक्रम आयोजना गरी पराजुलीलाई नगद पुरस्कार र सम्मान प्रदान गरेको हो।
कार्यक्रममा भाटभटेनी सुपरमार्केटका संस्थापक मीनबहादुर गुरुङले पराजुलीलाई दुबोको माला लगाइदिएर सम्मान गरे। साथै, पराजुलीलाई पाँच ग्रेड बढुवा गर्दै पाँच लाख रुपैयाँ नगद पुरस्कार प्रदान गरियो।
त्यस्तै, सोही घटनामा भाटभटेनी सुपरमार्केटको सुरक्षाका लागि महत्वपूर्ण भूमिका निर्वाह गर्ने अन्य कर्मचारीहरू पनि सम्मानित भए। सुरक्षा गार्ड सूर्य गिरी, दीपेश खड्का र सोमबहादुर भुजेललाई २५ हजार १ रुपैयाँ नगद तथा एक ग्रेड बढुवा गरिएको छ। साथै, ग्रोसरी सिनियर सुपरभाइजर सागर गुरुङलाई ५१ हजार एक सय ११ रुपैयाँको चेकसहित दुई ग्रेड बढुवा प्रदान गरिएको छ।
२२ वर्षदेखि भाटभटेनीमा सुरक्षा गार्डको रूपमा कार्यरत पराजुलीको साहसिक कार्यले सर्वसाधारणबाट पनि प्रशंसा प्राप्त गरिरहेको छ। उनको योगदानको उच्च मूल्यांकन गर्दै भाटभटेनीले सम्मान गरेको घटनाले कर्मचारीहरूको मनोबल बढाउने विश्वास गरिएको छ।
