बनियानी । लामो समयदेखि मर्मतसम्भार नगरिएको कारण बनियानी खानेपानी परियोजनाको मोटर बिग्रिएपछि स्थानीयवासी खानेपानीको चरम अभाव झेल्न बाध्य भएका छन्। कचनकवल-६ साविक बनियानी गाविसका ९ वटै वडाका बासिन्दा आजदेखि पानी बिना कठोर परिस्थितिको सामना गरिरहेका छन्।
खानेपानी ट्याङ्कीमा पानी चढाउने मोटरले निरन्तर सेवा दिइरहे पनि समयमै आवश्यक मर्मत नगरेको कारण बिग्रिएको स्थानीय स्रोतले जनाएको छ। पानी वितरणमा समस्या उत्पन्न भएपछि बनियानीका बासिन्दाले वैकल्पिक उपायको खोजी गरिरहेका छन्। कतिपय स्थानीयहरू पुराना चापकल बनाउन थालेका छन्।
स्थानीय निकाय र सरोकारवालाहरूले समस्याको समाधानका लागि आवश्यक कदम चाल्ने बताएका छन्। खानेपानी व्यवस्थापन समिति र सम्बन्धित निकायबीच छलफल भईरहेको र चाँडै मोटर मर्मत गरी सेवा सुचारु गर्ने योजना रहेको बताइएको छ। यद्यपि, मर्मत प्रक्रिया ढिला भएमा स्थानीयवासीलाई थप समस्या हुनसक्ने देखिन्छ।
स्थानीयहरू समयमै खानेपानी मोटरको मर्मतसम्भार र दिगो व्यवस्थापनका लागि सरोकारवाला निकायलाई गम्भीर ध्यान दिन आग्रह गरेका छन्।
