झापा - कचनकवल-भद्रपुर स्थानीय तहको समग्र विकासका लागि कचनकवल गाउँपालिका र भद्रपुर नगरपालिकाका प्रमुख तथा उपप्रमुखसहितको टोली काठमाडौंमा विभिन्न मन्त्रालयका मन्त्रीहरूसँग योजनाहरू पेश गर्दै घनीभूत छलफलमा जुटेको छ।
स्थानीय सरकारले पेश गरेका योजना तथा कार्यक्रमलाई केन्द्र सरकारले प्राथमिकताका साथ आगामी नीति, कार्यक्रम तथा बजेटमा समेट्ने विषयलाई बलियो बनाउन कचनकवल गाउँपालिकाका अध्यक्ष कालेन्द्र प्रसाद सिंह राजवंशी र उपाध्यक्ष नवराज भट्टराई, भद्रपुर नगरपालिकाका मेयर गणेश पोखरेल, कोशी प्रदेश भौतिक योजना तथा पूर्वाधार राज्यमन्त्री भूमि प्रसाद राजवंशी, निवर्तमान प्रदेशसभा सदस्य बसन्त कुमार बानियाँ लगायतको टोलीले कृषि, शहरी विकास, भौतिक योजना, शिक्षा, स्वास्थ्य, पर्यटन मन्त्रालयका मन्त्रीहरूसँग औपचारिक भेटघाट तथा छलफल जारी राखेको छ।
झापा क्षेत्र नम्बर ३ का समग्र योजनाहरूलाई प्रभावकारी ढंगले अघि बढाउन राज्यमन्त्री तथा निवर्तमान साँसद बानियाँ साथै नेपाली कांग्रेस र नेकपा (एमाले) का नेताहरू समेत एकढिक्का भई सहजीकरण गरिरहेका छन्। यसैक्रममा टोलीले आज उपप्रधानमन्त्री तथा अर्थमन्त्री माननीय विष्णु पौडेलसँग छलफल गर्दै महत्वपूर्ण योजनाहरू सरकारको आगामी नीति तथा बजेटमा समावेश गर्न विशेष आग्रह गरेको छ।
प्रादेशिक अस्पताल भद्रपुर,जी.पी. कोईराला स्मृति भवन निर्माणका लागि बजेट सुनिश्चत,कचनकवलका सडकहरू निर्माण कार्य,विद्यालय भवन निर्माण तथा स्तरोन्नतिका लागि आवश्यक बजेटको व्यवस्थापन साथै बहुवर्षीय योजनाहरूलाई निरन्तरता दिन आवश्यक नीति निर्माणका लागि छलफलपछि अर्थमन्त्री पौडेलले झापा-३ का विकास योजनाहरूलाई सरकारको नीति, कार्यक्रम र बजेटमा उच्च प्राथमिकताका रूपमा समावेश गर्ने प्रतिबद्धता व्यक्त गर्नुभएको छ। उहाँले झापाको समग्र विकासका लागि सरकारको पूर्ण सहयोग रहने विश्वास समेत दिलाउनुभएको बताईएको छ।
काठमाडौं केन्द्रित टोलीका सदस्यहरूले झापा क्षेत्र नं. ३ को दीर्घकालीन समृद्धि र पूर्वाधार विकासलाई गति दिन यस्ता छलफल र पहलहरूलाई निरन्तरता दिने प्रतिबद्धता जनाउँदै अर्थमन्त्री पौडेललाई धन्यवाद ज्ञापन गरेका छन्।
