झापा – कचनकवल गाउँपालिकाको समग्र विकासका लागि आज उच्चस्तरीय टोलीले संघीय सरकारका तीन महत्वपूर्ण मन्त्रालयमा विशेष योजना पेश गरेको छ। गाउँपालिका अध्यक्ष कालेन्द्र प्रसाद सिंह राजवंशी, भौतिक योजना तथा पूर्वाधार राज्यमन्त्री भुमि राजवंशी, र वडाध्यक्ष चिन्तामणि खरेलसहितको प्रतिनिधिमण्डलले कृषि, पर्यटन, र ऊर्जा मन्त्रालयका मन्त्रीहरूसँग भेट गरी कचनकवलको विकास योजना प्रस्तुत गरेका हुन्।
टोलीले कचनकवलको कृषि उत्पादन वृद्धि, पर्यटन प्रवर्द्धन, र ऊर्जा पूर्वाधार विस्तारका लागि आवश्यक परियोजनाहरू अघि सार्दै ती योजनालाई सरकारबाट विशेष प्राथमिकता दिन आग्रह गरेको छ। विशेषगरी, आधुनिक कृषि प्रविधि भित्र्याउने, स्थानीय पर्यटकीय स्थलहरूको प्रवर्द्धन गर्ने, तथा ग्रामीण क्षेत्रमा बिजुली तथा अन्य ऊर्जा स्रोतको सहज उपलब्धता सुनिश्चित गर्ने विषयमा छलफल गरिएको बताइएको छ।
गाउँपालिकाका नेतृत्वले कचनकवललाई आत्मनिर्भर बनाउने उद्देश्यसहित प्रस्तुत गरेका योजनाहरू सकारात्मक रूपमा लिइएको र सम्बन्धित मन्त्रालयहरूले आवश्यक प्रक्रिया अघि बढाउने प्रतिबद्धता व्यक्त गरेको बताइएको छ।
यस पहलले कचनकवलको दिगो विकासमा महत्वपूर्ण योगदान पुर्याउने अपेक्षा गरिएको छ।
