झापा । कचनकवल गाउँपालिका वडा नम्बर ७ स्थित पाथिभरा सामुदायिक वन भित्र एक अजङ्गको दँताल हात्ती मृत अवस्थामा फागुन २८ गते साँझ ५:३० बजे सेतेको खालमा सडिएको अवस्थामा भेटिएको र उक्त हात्तीलाई वरिपरि चार अन्य हात्तीले घेरेर राखेको हल्लाले सनसनी फैलिएको थियो।
उक्त हल्लाका कारण प्रहरीलगायतको टोली सोही दिन हात्ती मृत फेला परेको स्थानसम्म पुग्न सकेन। तर, फागुन २९ गते बिहान इलाका प्रहरी कार्यालय, जिल्ला वन कार्यालय, सामुदायिक वनका पदाधिकारी तथा स्थानीयको टोली घटनास्थलमा पुगेको थियो।
घटनास्थलमा पुगेपछि टोलीले शरीर सडिएको र देब्रे तर्फको दाँत गाडिएको अवस्थामा देखे पनि दायाँ तर्फको दाँत भने काटिएको अवस्थामा फेला परेको बुझिएको छ। उक्त दाँत कहिले काटिएको हो भन्ने विषयमा स्पष्ट जानकारी प्राप्त हुन सकेको छैन।
यस घटनाले हात्ती दाँत चोरी तथा वन्यजन्तु संरक्षण सम्बन्धी गम्भीर प्रश्न उठाएको छ। स्थानीय प्रशासनले घटनाको अनुसन्धान अघि बढाएको छ भने चोरी शिकारीको संलग्नताको आशंका गरिएको छ।
