काठमाडौँ, ०२ चैत – सत्तारुढ नेकपा (एमाले) ले पूर्वराजा ज्ञानेन्द्र शाहको संलग्नतामा केही दिनयता जारी रहेका संविधान र मुलुकहितविपरीतका गतिविधि नियन्त्रण गर्न सरकारसँग माग गरेको छ।
मंगलबार प्रतिनिधिसभाको आकस्मिक समयमा बोल्दै एमालेका प्रमुख सचेतक महेश बर्तौलाले संविधानविपरीतका गतिविधिहरू पूर्वराजाको निर्देशन, उक्साहट र प्रत्यक्ष संलग्नतामा भइरहेको आरोप लगाए। उनले मुलुकको संविधान र राष्ट्रिय हितमाथि प्रश्न उठाउने गतिविधि तत्काल रोक्न सरकारलाई आग्रह गरे।
बर्तौलाले केही समूहले पञ्चायतकालीन राष्ट्रिय गान गाउने, भारतीय जनता पार्टी (भाजपा) का नेता तथा उत्तर प्रदेशका मुख्यमन्त्री योगी आदित्यनाथको फोटो प्रदर्शन गर्ने जस्ता कार्य गरेर मुलुकको सार्वभौमिकतामाथि आँच पुर्याउने प्रयास गरिरहेको बताए। उनले संविधानको धारा ५ अनुसार राष्ट्रहितविपरीतका कार्यलाई दण्डनीय ठहर गरिएको भन्दै त्यस्ता गतिविधिमा संलग्नहरूमाथि कडा कारबाही गर्नुपर्ने धारणा राखे।
उनले लोकतन्त्रको विकल्प राजतन्त्र हुन नसक्ने उल्लेख गर्दै इतिहासले संग्रहालयमा थन्काइसकेको राजतन्त्रलाई पुनःस्थापित गर्ने कुनै सम्भावना नभएको स्पष्ट पारे। लोकतान्त्रिक मूल्य र संविधानको रक्षा गर्दै मुलुकलाई अगाडि बढाउनु आवश्यक रहेको उनको भनाइ थियो।
सत्तारुढ दल एमालेको चेतावनीसँगै सरकार अब यस विषयमा के कदम चाल्छ भन्ने चासो बढेको छ।
