झापा, १५ फागुन - झापा कचनकवल गाउँपालिका-४, पक्लावान बस्ने अब्वास मियाँको परालको कुन्युमा अकस्मात आगलागी हुँदा करिब २० हजार रुपैयाँ बराबरको क्षति भएको छ।
आज दिउँसो २:२० बजे सुरु भएको आगलागी नियन्त्रणका लागि इलाका प्रहरी कार्यालय (इप्रका) केचनाबाट प्रहरी नायब निरीक्षक (प्रनानि) राजन कुमार प्रधानको कमाण्डमा ६ जनाको टोली, साथै विओपी केचनाबाट सशस्त्र प्रहरी निरीक्षक (स.प्र.नि.) विष्णु प्रसाद दहालको कमाण्डमा ७ जनाको टोली परिचालित भएको थियो।
स्थानीय बासिन्दा तथा भद्रपुर नगरपालिकाको वारुणयन्त्र (दमकल) को सहयोगमा प्रयास जारी राख्दा ४:०० बजे आगो पूर्ण रूपमा नियन्त्रणमा आएको इलाका प्रहरी कार्यालय केचनाले जनाएको छ।
प्रहरीका अनुसार, आगलागीबाट करिब ४ बिघा पराल जलेर नष्ट भएको छ। आगलागीको कारण खुल्न सकेको छैन। स्थानीय प्रशासनले घटनाबारे थप अनुसन्धान भइरहेको जनाएको छ।
आगो नियन्त्रणका लागि प्रहरी, सशस्त्र प्रहरी, स्थानीयबासी र दमकलको संयुक्त प्रयास सफल भएको थियो। यस घटनामा मानवीय वा चौपायामा कुनै क्षति नभए पनि कृषिका लागि संकलित पराल जलेर नष्ट हुँदा ठूलो आर्थिक नोक्सानी भएको छ।
आगो लाग्नुको कारण पत्ता लगाउन अनुसन्धान भइरहेको प्रहरीले जनाएको छ।
