झापा, शुक्रबार - गौरीशंकर खड्का स्मृति प्रतिष्ठानद्वारा आयोजित १४औँ स्मृति दिवस कार्यक्रममा माओवादी केन्द्रका उपमहासचिव वर्षमान पुनले अब समाजवादी क्रान्तिको नेतृत्व पनि प्रचण्डले नै गर्नुपर्ने बताएका छन्।
झापाको बिर्तामोडमा आयोजित कार्यक्रममा पुनले माओवादी आन्दोलन समाजवादी क्रान्तितर्फ अघि बढ्नुपर्ने औंल्याउँदै प्रचण्डकै नेतृत्व आवश्यक रहेको उल्लेख गरे। उनले भने, "सधैं प्रचण्डको जस्तै उचाइको नेता नहुन सक्छ, तर समाजवादी क्रान्तिको नेतृत्व गर्न प्रचण्ड योग्य छन्। मैले उहाँसँग २८ वर्ष केन्द्रीय कमिटीमा सँगै काम गरेको छु। गल्ती कमजोरी भए हामी सबैको साझा जिम्मेवारी हो। इतिहास बदल्ने नेताहरू नै राजनेता हुन्, प्रचण्ड त्यही राजनेता हुनुहुन्छ।"
कांग्रेस-एमालेसँग गठबन्धन नहुने पुनको प्रष्टोक्ति :
पुनले अब नेपाली कांग्रेस र एमालेसँग चुनावी गठबन्धन नगर्ने स्पष्ट पारे। उनले भने, "चुनावपछि सहकार्य गर्न सकिन्छ, तर स्थानीयदेखि संघीय तहसम्म एउटै गठबन्धन बनाउने सम्भावना छैन। कांग्रेस र एमाले यथास्थितितर्फ उन्मुख छन्। उनीहरू प्राप्त उपलब्धि उल्टाउने प्रयासमा छन्।"
गौरीशंकर खड्काको योगदान स्मरण :
पुनले गौरीशंकर खड्का युद्धकालीन सहयात्री भएको स्मरण गरे। उनले पूर्वी कमाण्डमा काम गर्दा खड्काले स्थानीय संस्कृति र भूगोल चिनाउने महत्वपूर्ण भूमिका खेलेको बताए। खड्कालाई निडर, इमानदार र सादगी जीवन जिउने नेता भन्दै पुनले उनको योगदान उच्च सम्मानका साथ सम्झे।
पत्रकार घिमिरेसहित १७१ जनालाई सम्मान :
स्मृति दिवसकै अवसरमा पत्रकार चिरञ्जीवी घिमिरेलाई समाज रूपान्तरणमा योगदान गरेको भन्दै नगद १५ हजार रुपैयाँसहित सम्मानपत्र प्रदान गरिएको छ। साथै, जनयुद्ध र जनआन्दोलनका क्रममा जेलजीवन बिताएका १७१ जनालाई पनि सम्मान गरिएको प्रतिष्ठानका अध्यक्ष राजु चुडालले जानकारी दिए।
