पथरिया, कचनकवल - कचनकवल गाउँपालिका वडा नम्बर २ ले वडावासी नागरिकलाई अत्यावश्यक विभिन्न सामाग्री हस्तान्तरण गरेको छ। वडाको पहलमा कृषक तथा विपन्न नागरिकलाई लक्षित गर्दै सहुलियत दरमा कृषि उपकरण तथा निशुल्क खानेपानीको सुविधा उपलब्ध गराइएको छ।
वडा कार्यालयले ७० प्रतिशत अनुदानमा ५० जना कृषकलाई १.५ इन्च क्षमताको पानी तान्ने मोटर, ४० जना कृषकलाई औषधि छर्कने स्प्रे ट्यांकी वितरण गरेको छ। साथै, खानेपानीको सुविधा नपाएका ३१ जना विपन्न नागरिकलाई निशुल्क चापकल प्रदान गरिएको छ।
वडाध्यक्ष लेखनाथ खत्रीको व्यवस्थापनमा सम्पन्न उक्त सामाग्री वितरण कार्यक्रममा कचनकवल गाउँपालिका अध्यक्ष कालेन्द्र प्रसाद सिंह राजवंशी, उपाध्यक्ष नवराज भट्टराई, प्रमुख प्रशासकीय अधिकृत स्काई पोख्रेल, कार्यपालिका सदस्य धनबहादुर गुरुङ लगायत अन्य पदाधिकारीहरूको उपस्थिति रहेको थियो।
सहयोग प्राप्त गरेका कृषक तथा नागरिकहरूले स्थानीय सरकारको यस प्रयासको खुलेर प्रशंसा गरेका छन्। उनीहरूले जनताको आवश्यकता पहिचान गर्दै सहुलियतमा सहयोग प्रदान गर्ने वडालाई धन्यवाद व्यक्त गर्दै सरकार सधैं गरिब, विपन्न तथा सर्वसाधारणको जीवनस्तर उकास्ने कार्यमा क्रियाशील रहनुपर्ने धारणा व्यक्त गरे।
यस प्रकारको योजनाले स्थानीय स्तरमा कृषकहरूको उत्पादकत्व वृद्धि गर्नुका साथै विपन्न वर्गलाई आधारभूत सुविधामा पहुँच विस्तार गर्ने लक्ष्य पूरा गर्ने विश्वास गरिएको छ।
