झापाको बिर्तामोड-४ स्थित मेघावारी टोलमा ५ बर्ष अघि मात्रै कचनकवल-२(डाँडागाउँ ) बाट बिर्तामोड आउनु भएकी ६८ बर्षीय एकल महिला मृत अवस्थामा फेला परेको छ । घटना शङ्कास्पद देखिएकोले सुनसरीको धरानबाट कुकुरसहितको टोली मगाइएको जिल्ला प्रहरी कार्यालय झापाका एसपी मिलन केसीले बताए ।
टाउकोमा गहिरो चोट देखिएको ६८ वर्षीया विष्णुमाया विष्ट बुधबार बिहान घरभित्रै मृत फेला परेको र दुई भाइ छोराहरु मध्ये जेठो छोरा ईन्द्र बहादुर बिष्ट अमेरिका बस्दै आएकोमा कान्छा छोरा प्रकाश बिष्ट काठमाडौबाट आईपुगेकाछन् ।
घटना सार्वजनिक हुनसाथ झापाका एसपी केसी आफै घटनास्थल पुगेका छन् । ‘प्रहरीले घटनास्थललाई सुरक्षित राखेको छ,’ एसपी केसीले भने, ‘घटना शङ्कास्पद देखिएको हो, अहिले नै हत्या भएको वा नभएको भन्ने अवस्था छैन ।’
कुकुर आएपछि घटना बारेमा थप कुरा बाहिर आउने उनको भनाई छ । यता स्थानीयका अनुसार गएराती गाउँमा चोर आएको थियो । गाउँलेले चोर आएको थाहा पाएपछि लखेटेका थिए । त्यही चोरले एक्लै बस्दै आएकी वृद्धालाई मारेको हो कि भन्ने आशङ्का स्थानीयले गरेका छन् ।
