कचनकवल। चाराली-केचना हुलाकी राजमार्गको बनियानी स्थित श्याम भेटवालको घर अगाडिको सडकमा विपरीत दिशातर्फ तीब्र गतिमा हुईकिएका दुई मोटरसाइकल आपसमा जुद्धा एकजनाको मृत्यु भएको छ।
शुक्रबार राति ९:१० बजेको समयमा बिआर ३७-३९४४ नम्बरका मोटरसाइकल चालक कचनकवल-४ बस्ने ४१ बर्षीय कृष्ण कुमार शाह(रञ्जित )को उपचारका क्रममा ॐ साई पाथीभरा अस्पतालमा मृत्युु भएको र सोही वडाका पछाडि सवार १५ बर्षीय सन्दीप कुमार माझीलाई थप उपचारका लागि विर्तामोड स्थित विएण्डसी अस्पताल रेफर गरिएको छ।
मे ८ प ८१७ नम्बरको मोटरसाइकलमा सवार कचनकवल-७ का २४ बर्षीय राम बहादुर राजवँशी र कचनकवल-६ का २१ बर्षीय गोपाल राजवँशीको खुट्टामा गम्भीर चोट लागेकाले दुवै जनालाई भद्रपुरस्थित ॐ साइँ पाथीभरा अस्पतालमा उपचार भईरहेको छ।
स्थानीयले बताए अनुसार रातिको समयमा तीब्र गतिमा सवारी चलाएकाले नै सजिलो सडकमा समेत गम्भीर दुर्घटना भएको हो । दुर्घटना हुनसाथ स्थानीय पुगी उद्धारमा जुट्दा १ जना सडक भन्दा झण्डै ४० फिट अगाडि नालीमा उछिटिएर खुट्टा भाँचिएर लडेको अवस्थामा फेला परेको र बाँकी ३ जना मध्ये १ जना घटनास्थलमै मृत्यु भएको स्थानीयले बताएकाछन्।
दुर्घटना भएको दुवै मोटरसाइकललाई ईलाका प्रहरी कार्यालय बनियानीमा राखिएको र घाईतेलाई उपचारका लागि अस्पताल पठाईएको अस्थायी ट्राफिक पोष्ट बनियानीका ट्राफिक जवान मनोज पुरीले बताउनु भएको छ।
