बालुवाडी, साउन २० - कचनकवल गाउँपालिका अन्तर्गतका सम्पूर्ण स्वास्थ्य संस्थाबाट सहभागी स्वास्थ्यकर्मीहरूको आन्तरिक अवलोकन भ्रमण कार्यक्रम आज स्वास्थ्य चौकी बालुबाडीमा सभ्य र सफल रूपमा सम्पन्न भएको छ।
गाउँपालिका स्वास्थ्य शाखाको परामर्शमा आयोजित कार्यक्रममा प्रत्येक स्वास्थ्य संस्थाबाट दुई/दुई जना स्वास्थ्यकर्मीले सहभागिता जनाएका थिए। कार्यक्रममा स्वास्थ्य संस्था संचालन तथा व्यवस्थापन समितिका अध्यक्ष हरि सिग्देलको अध्यक्षता रहेको कार्यक्रममा गाउँपालिका अध्यक्ष कालेन्द्र प्रसाद सिंह राजबंशी प्रमुख आतिथि, उपाध्यक्ष नवराज भट्टराई विशिष्ट आतिथि र वडा अध्यक्ष भरत राजबंशी अतिथि रहनु भएको कार्यक्रममा बालुबाडी स्वास्थ्य चौकी परिवारको ब्यवस्थापन रहेको थियो।
स्वास्थ्य शाखा प्रमुख जागेश्वर प्रसाद यादवको विशेष निर्देशन र परामर्शमा आयोजित आन्तरिक भ्रमण कार्यक्रममा सहभागी स्वास्थ्यकर्मीहरूले बालुबाडी स्वास्थ्य चौकीको कार्यक्रम, सेवा, सूचकहरूको प्रगति, व्यवस्थापन प्रणाली लगायतका विविध पक्षहरू अवलोकन गर्दै आपसमा अनुभव साटासाट गरेका थिए।
स्वास्थ्य शाखा प्रमुख यादवले कार्यक्रममा भन्नुभयो, "स्वास्थ्यकर्मीहरूले सिक्ने/सिकाउने कार्यलाई आत्मसात गर्दै आन्तरिक अवलोकन र अनुभव साटासाटमार्फत नयाँ प्रेरणादायी उदाहरण प्रस्तुत गरेका छन्।"
गाउँपालिका अध्यक्ष सिंहले कार्यक्रममा बोल्दै भन्नुभयो, “बालुबाडी स्वास्थ्य चौकीले न्यूनतम सेवा मापदण्डमा देखाएको सुधार प्रेरणादायी छ। यसले सम्पूर्ण पालिका भित्रका स्वास्थ्य संस्थाहरूलाई अझ प्रभावकारी सेवा दिन मार्गदर्शन गर्नेछ।”
गाउँपालिका उपाध्यक्ष नवराज भट्टराईले पनि भ्रमणको उपलब्धिबारे चर्चा गर्दै भन्नुभयो, “यस्ता कार्यक्रमहरूले स्वास्थ्यकर्मीहरूमा थप ऊर्जा, समझदारी र समन्वयको भावना विकास गर्छन्, जुन सेवाको गुणस्तर सुधारमा अत्यन्त उपयोगी हुन्छ।”
कचनकवल गाउँपालिका भित्रको पहिलो र ऐतिहासिक साझा प्रयास र सहकार्यद्वारा सम्पन्न भएको आजको भ्रमण कार्यक्रम सहभागी सबैका लागि प्रेरणादायी र फलदायी भएको भन्दै आयोजक पक्षले आगामी दिनमा यस्ता कार्यक्रमलाई निरन्तरता दिने प्रतिबद्धता व्यक्त गरेका छन्।
