झापा - बनियानी खानेपानी उपभोक्ता समितिको व्यवस्थापन अन्तर्गत संचालित खानेपानी ट्याङ्कीबाट हाल १,३०५ घरपरिवार प्रत्यक्ष रूपमा लाभान्वित हुँदै आएका छन्। उपभोक्ताहरूले मासिक रूपमा पानीको शुल्क बुझाउँदै आए पनि समितिले वार्षिक साधारणसभा कोठामा सीमित गरेर आय-व्यय सार्वजनिक गर्दै आएको विषय अहिले पुनः बहसको विषय बनेको छ।
हिजोदेखि ट्याङ्कीमा पानी चढाउने दुवै पम्पमा खराबी आएपछि बनियानीवासी खानेपानीको चरम अभावमा परेका छन्। सहज आपूर्तिको भरमा रहेका उपभोक्ताहरू वैकल्पिक उपाय अवलम्बन गर्न नसक्ने अवस्थामा पुगेका छन्, किनभने पुराना चापकलहरू प्रयोगविहीन छन् भने पानीको अत्यधिक आईरन हटाउन राखिएका फिल्टरहरू वेवारिसे अवस्थामा छन्।
सचेत उपभोक्ताको अभावले होला खानेपानी समितिले वार्षिक आम्दानी सार्वजनिक गर्दा पनि महत्वपूर्ण पूर्वतयारी नगरेको देखिन्छ। मासिक लाखौं रुपैयाँ संकलन गर्ने समितिले खानेपानी आपूर्तिको निरन्तरताका लागि अनिवार्य रूपमा आवश्यक पर्ने वैकल्पिक उपायहरू अवलम्बन नगर्दा यस्तो अवस्था सिर्जना भएको हो। यदि समितिले बिधुतीय मोटर पम्पको वैकल्पिक प्रबन्ध साथै जेनेरेटरको व्यवस्था गरेको भए उपभोक्ताहरूलाई अहिले यस्तो कठिनाइको सामना गर्नुपर्ने थिएन।
यो घटनाबाट खानेपानी उपभोक्ता समितिले गम्भीर पाठ सिक्नुपर्ने देखिन्छ। भविष्यमा यसखाले परिस्थितिको पुनरावृत्ति रोक्नका लागि समितिले वैकल्पिक व्यवस्थापनका उपायहरू अवलम्बन गर्न आवश्यक छ। स्थानीय निकाय र सरोकारवालाहरूले समेत यस विषयमा ध्यान दिएर समस्याको स्थायी समाधान खोज्नुपर्ने देखिन्छ।
